राष्ट्रपति द्रौपदी मुर्मू संविधानक अनुच्छेद ८० केर उपधारा (१) केर खंड (क) आ खंड (३) द्वारा देल गेल अधिकारक उपयोग करैत ४ नव सदस्यकेँ राज्यसभामे नामित कयलनि। पूर्व विदेश सचिव हर्ष वर्धन श्रृंगला, उज्ज्वल देवराव निकमकेँ नाम शामिल कयल गेल अछि।
ई नियुक्ति सदस्यक सेवानिवृत्तिक कारण रिक्त पदकेँ भरय लेल कएल गेल अछि। गृह मंत्रालय द्वारा जारी अधिसूचना (एस.ओ. 3196(ई)) केर अनुसार एकर घोषणा 12 जुलाई, 2025 केँ भेल छल।
नामित सदस्यमे उज्ज्वल देवराव निकम, सी. सदनंदन मास्टर, हर्ष वर्धन श्रृंगला आ डॉ. मीनाक्षी जैन शामिल छथि।
एही नियुक्तिक उद्देश्य राज्यसभामे विभिन्न क्षेत्रक विशेषज्ञ आ प्रख्यात व्यक्तिकेँ प्रतिनिधित्व सुनिश्चित केनाई अछि, एकर संविधानमे प्रावधान अछि।
संविधानक अनुच्छेद ८० केर तहत राष्ट्रपतिकेँ राज्यसभामे ऐहन व्यक्तिकेँ नामित करय केर अधिकार देल गेल अछि जे कला, साहित्य, विज्ञान, समाज सेवा आ अन्य क्षेत्रमे उत्कृष्ट योगदान देने छथि। संसदक उच्च सदनमे विविध दृष्टिकोण आ विशेषज्ञताक नियुक्ति महत्वपूर्ण मानल जाइत अछि।
नामित सदस्यक भूमिका विधायी चर्चामे महत्वपूर्ण योगदान देनाई आ राष्ट्रीय हितक मुद्दा पर विचार-विमर्शकेँ समृद्ध केनाई अछि।
उज्ज्वल देवराव निकम, सी. सदनंदन मास्टर, हर्ष वर्धन श्रृंगला आ डॉ. मीनाक्षी जैन अपन-अपन क्षेत्रमे उल्लेखनीय काज लेल जानल जाइत छथि। जनतब अछी जे हर्ष वर्धन श्रृंगला केर नियुक्ति हुनक कूटनीतिक अनुभवक आधार पर महत्वपूर्ण मानल जा रहल अछी, जखनि की डॉ. मीनाक्षी जैन इतिहास आ संस्कृतिक क्षेत्रमे अपन विद्वातापूर्ण योगदानक लेल जानल जाइत छथि। निकम अजमल कसाबक खिलाफ केस लड़य लेल जानल जाइत छथि। ओ 26/11 केर मुंबई आतंकी हमलामे जिंदा पकड़ल गेल एकमात्र आतंकवादी कसाबकेँ फांसीक सजाक कड़ा वकालत कयने छलाह।
एहि नव नामित सदस्य द्वारा राष्ट्रीय आ अंतर्राष्ट्रीय मुद्दा पर अपन विशेषज्ञतासँ संसदमे सकारात्मक योगदान देबय केर उम्मीद अछि। ई कदम सरकार केर विधायी प्रक्रियामे विविध क्षेत्रक विशेषज्ञकेँ शामिल करय केर प्रतिबद्धताकेँ सेहो दर्शाबैत अछि।
