कोसी रेंजक पुलिस उप महानिरीक्षक आ पुलिस अधीक्षक केर निर्देशनमे जनतासँ भेटल कुल 12428 शिकायत पर सफलतापूर्वक प्रक्रिया कयल गेल। आ संगहि शहरक सुन्दर यातायात व्यवस्था लेल जामसँ मुक्ति देल गेल। एहि संबंधमे ट्रैफिक डीएसपी प्रवीण कुमार बृहस्पतिदिन सदर थानामे पत्रकार सम्मेलनक आयोजन कए जानकारी देलनि। ओ कहलनि जे, आपातकालीन प्रतिक्रिया वाहन 112 केर तहत कुल 20 गाड़ी आ 16 मोटरसाइकिल काज कय रहल अछि। ओ कहलनि जे, ईआरबी केर तहत सूचना भेटलाक बाद पुलिस द्वारा शीघ्र कारवाई कयल जा रहल अछि। पुलिस उपाधीक्षक कहलनि जे, एखन धरि जनवरी महीनासँ 22 जून धरि कुल 12428 शिकायतक सफलतापूर्वक निपटारा भेल अछि, जे, जनवरीमे 1719, फरवरीमे 1957, मार्चमे 2106, अप्रैलमे 1747 मामिला दर्ज भेल छल।ओतहि मई मासमे 2636 आ जूनमे 2213 मामिलाक त्वरित कारवाई सुनिश्चित कयल गेल। ओ कहला जे मई मासमे आपसी विवादसँ संबंधित 488, जमीनक विवादसँ संबंधित 132, चोरीसँ संबंधित 42, शराबसँ संबंधित 28 आ महिलाक उत्पीड़न आ दुर्घटनासँ संबंधित 326 विविध मामिलाक निपटारा भऽ चुकल अछि। ओ कहला जे शहरमे यातायात व्यवस्थाक बेहतर बनेबा लेल शंकर चौक, महावीर चौक, शहीद चौक, सब्जी बाजार आ बंगाली बाजारमे अतिक्रमण दूर कयल गेल अछि। संगहि बैरिकेडिंग केर सब ठाम 8 सँ 10 फीटक सड़क उपलब्ध कराओल गेल अछि। बिना बलक प्रयोग कयने जामक स्थिति पर काफी नियंत्रण भऽ गेल अछि। ओ कहला जे सब्जी बाजारक खुदरा आ थोक विक्रेताक शहरक सुपर मार्केटमे चिन्हित जगह पर स्थानांतरित कय देल जाएत। जाहि लेल व्यापारीसँ गप भऽ रहल अछि। संगहि रेलवे गेटक संबंधमे जाम केर नियंत्रित करबाक प्रयास भऽ रहल अछि। भारी ट्रकक प्रवेश रातिमे बंद कय देल गेल अछि। ओ कहलनि जे, शहरमे पिछला 15 दिनमे नियमित रूपसँ रातिमे गश्तक कारण कोनो अप्रिय वा पैघ घटना नहिं भेल अछि।
