प्रशांत किशोर कहलनि जे बिहारमे भाजपाक कोनो विशेष स्थिति नहिं अछि, जे सभ नीतीश कुमारकेँ सत्तामे रखने छथि ओ सभ बिहारक समस्याक अनदेखी कए रहल छथि।
प्रशांत किशोर बुधकेँ सुपौलमे प्रेस कॉन्फ्रेंसक दौरान बिहारक मुख्यमंत्री नीतीश कुमार आ विपक्षक नेता तेजस्वी यादव पर बड़का हमला कयलनि। ओ कहलनि जे ई दुनू नेता बिहारक वर्तमान स्थितिक लेल पूर्ण रूपसँ जिम्मेदार छथि। तेजस्वी यादवक ‘आभर यात्रा’ पर प्रहार करैत किशोर कहलनि जे “नवमी फेल” नेताकेँ बिहारक जनताक प्रति आभार व्यक्त करबाक चाही जे हुनका सत्तासँ बाहर कयलाक बादो जनता उग्र विरोध नहिं कयलक।
संगहि प्रशांत किशोर कहलनि, “जाहि जनताकेँ हुनकर माता-पिता आ सरकार बेरोजगार, अनपढ़ आ पलायनक अड्डा बना देलक अछि, ओ जनता जँ आभार व्यक्त करबाक बदला हुनका सभकेँ मारि कऽ भगबितैक, तऽ तैयो ठीक रहितैक।”
ओ इहो कहलनि जे तेजस्वी यादव सन नेता बिहारक समस्याकेँ आओर जटिल बना रहल छथि। प्रशांत किशोर इहो कहलनि कि जखनि तेजस्वी यादव विपक्षमे छलाह तखनि बिहारक कानून व्यवस्थाक स्थिति बहुत खराब कहल जा रहल छल, मुदा जखनि हुनका उप मुख्यमंत्री बना देल गेल तखनि उहे बिहार हुनका स्विट्जरलैंड जकाँ देखाय लागल।
ओतहि प्रशांत किशोर अमेरिकामे राहुल गाँधीक भारतक चुनाव आयोग पर उठाओल गेल प्रश्न पर सहमत भेलाह। ओ कहलनि जे केन्द्र सरकार चुनाव आयोगपर दबाव बनबैत अछि जे ओ अपन अनुसार काज करय। जखनि प्रशांत किशोरसँ पूछल गेल जे की ओ भाजपाक बी-टीम जकाँ काज कऽ रहल छथि तखनि ओ एकर जोरदार खण्डन कयलनि।
किशोर कहलखिन, “बिहारमे भाजपाक कोनो विशेष स्थिति नहिं अछि, जे सभ नीतीश कुमारकेँ सत्तामे रखनै छथि ओ सभ बिहारक समस्या केर अनदेखी कऽ रहल छथि।” ओ आरोप लगबैत कहलनि कि बिहारक बर्बादीक लेल कांग्रेस आ भाजपा सेहो जिम्मेदार अछि, कियैकि ई दल केंद्रीय राजनीतिमे सत्ता लेल बिहारक समस्या केर अनदेखी कयलक अछि।
