ककरो लेल रणनीति बनायब आ स्वयं रणक्षेत्रमे उतरबमे बहुत अंतर होइत अछि। अक्सर बहुत एहेन शिक्षक देखल गेल छथि जे स्वयं यूपीएससी परीक्षामे सफल नहिं भऽ सकलाह मुदा अपन शिक्षाक क्लास चला कतेकोकेँ यूपीएससी परीक्षामे उत्तीर्ण करबा दैत छथि। एहने किछु हाल राजनीतिक परीक्षामे प्रशांत किशोरक भेल अछि। राजनीति केर सफल रणनीतिकार स्वयं जखनि रणमे उतरलाह तऽ चारु नाल चित्त भऽ गेलाह। बिहार विधानसभाक भेल उपचुनावमे प्रशांत किशोरक पार्टी ‘जन सुराज’ कोनो चमत्कार नहिं कऽ सकल, बस महागठबंधनक लेल वोटकटुआ सिद्ध भेल, एहेन चर्चा अछि।
बिहार उपचुनावमे एनडीए उम्मीदवारक जीत सँ ‘इ़डिया’ गठबंधन आ प्रशांत किशोरक पार्टीकेँ झटका लागल अछि। प्रशांत किशोरक पार्टीक कोनो जादू काज नहि आबि सकल।
बिहारक चारिटा विधानसभा सीटक उपचुनावक परिणाम शनिदिन दुपहरियामे घोषित कयल गेल, जाहिमे राष्ट्रीय जनतांत्रिक गठबंधन (एनडीए) सभटा सीट जीतलक। परिणामक बाद ‘इंडिया’ गठबन्धन आ प्रशांत किशोरक पार्टीकेँ पैघ झटका लागल अछि। प्रशांत किशोरक पार्टी चारु सीट पर दोसर स्थान पर सेहो नहि आयल। इमामगंज आ बेलागंजमे जन सुराज तेसर स्थान पर रहल, जखनि कि रामगढ़ आ तरारी सीट पर जन सुराजकेँ १०,००० वोट सेहो नहि भेटल। ओतहि जन सुराजकेँ चुनावी मैदानमे आबय केर कारण ‘इंडिया’ गठबंधनकेँ सबसँ बेसी नुकसान भेल अछि।
