कर्नाटकक हासन सीटसँ सांसद आ चुनावमे भाजपाक सहयोगी जद(एस)क वर्तमान उम्मीदवार प्रज्वल रेवन्नाकेँ एसआईटी जाँच पूरा होयबा धरि पार्टीसँ निलंबित कऽ देल गेल अछि। जेडीएस कोर कमेटीक अध्यक्ष जीटी देवगौड़ा कहलनि, “हम प्रज्वल रेवन्नाक खिलाफ एसआईटीकेँ स्वागत करैत छी। हम अपन पार्टीक राष्ट्रीय अध्यक्षकेँ एसआईटी जाँच पूरा होयबा धरि पार्टीसँ निलम्बित करबाक सिफारिश करबाक निर्णय लेने छी। कर्नाटकक पूर्व मुख्यमंत्री आ जेडीएस नेता एचडी कुमारस्वामी कहलनि जे जांच पूरा होयबा धरि ओकर (प्रज्वल रेवन्ना) निलंबन अछि।
आरोपी प्रज्वल रेवन्ना पूर्व प्रधानमंत्री एचडी देवगौड़ाक पोता छथि। प्रज्वलक पिता कर्नाटकमे विधायक छथि आ चाचा पूर्व मुख्यमंत्री एचडी कुमारस्वामी छथि। प्रज्वल रैवन्ना पर यौन उत्पीड़न, सैकड़ो सेक्स वीडियो रिकॉर्डिंग, धमकी आ षड्यंत्रक आरोप लगाओल गेल अछि। कतेको वीडियो वायरल भेलाक बाद प्रज्वल रेवन्नाक जर्मनी चलि जयबाक समाचार आयल अछि।
एहि मुद्दा पर राजनीति गरमा गेल अछि। किएक तँ पीएम मोदी प्रज्वल रेवन्नाक लेल प्रचार करय गेल छलाह, तेँ कांग्रेस हुनका पर हमला कयलक अछि। कांग्रेस महासचिव प्रियंका गाँधी कहलनि जे प्रधानमंत्री आइ-काल्हि महिलाक मंगलसूत्र आ गहनाक बात करैत छथि। कर्नाटकमे, जकरा लेल मोदीजी वोट माँगलनि, ओ हजारो महिलाक संग दुष्कर्म कयलक। हम पूछय चाहैत छी जे हमर प्रधानमंत्री आ गृह मंत्री एहि बारेमे की कहैत छथि ? मोदी जी, देशक करोड़ो महिला जवाब मांग रहल अछि। मंगलसूत्रक बात करबासँ पहिने देशक स्त्रीगणकेँ उत्तर दियौक।
महिला कांग्रेसक अध्यक्ष अलका लांबा कहलनि जे प्रधानमंत्री मोदी, गृह मंत्री अमित शाह, महिला आ बाल विकास मंत्री स्मृति ईरानी आ राष्ट्रीय महिला आयोगक अध्यक्ष रेखा शर्माकेँ अपन चुप्पी तोड़बाक चाही आ भाजपाक सांसद प्रज्वल रेवन्नाक सनसनीखेज मामिलामे जद(एस)क सङ्ग अपन गठबंधन समाप्त करबाक चाही।
एकर जवाबमे अमित शाह गुवाहाटी (असम) मे कहलनि कि “प्रज्वल रेवन्नाक जे अखबार आ चैनलमे चलायल जा रहल अछि ओ एकदम चौंकाबय वाला अछि आ भाजपाक रुख एकदम स्पष्ट अछि कि हम देशक मातृशक्तिक संग ठाढ़ छी, हम कांग्रेससँ पुछय चाहैत छी जे ओतए सरकार ककर अछि। सरकार कांग्रेस पार्टीक अछि। ओ एखन धरि कोनो कार्रवाई किएक नहि कयलक ? हमरा कारवाई करबाक जरूरत नहिं अछि। ई राज्यक कानून व्यवस्थाक मुद्दा अछि, राज्य सरकारकेँ एहि पर कार्रवाई करय पड़त, हम जांचक पक्षमे छी आ हमर सहयोगी जद(एस) सेहो एकरा खिलाफ कारवाईक घोषणा कयलक अछि, आइ हुनकर कोर कमिटीक बैसार अछि आ कदम उठाओल जायत।”
अभिनेत्री पूनम कौर प्रज्वल रेवन्ना एहेन दरिंदा जे ‘मोदी परिवार’क हिस्सा अछि, केर लऽ कऽ मोदी सरकार आ भाजपासँ कड़गर सवाल करैत महिलासभकेँ सावधान रहय केर सलाह देलनि अछि।
