सहरसा जिलामे विद्यालय शिक्षा समितिक चुनावक दौरान एकटा पैघ विवाद सामने आयल अछि, नवहट्टा प्रखंडक उत्क्रमित मध्य विद्यालय लालपुरमे सोमदिन शिक्षा समितिक अध्यक्ष आ सचिव पदक चुनावक दौरान पुलिसक मौजूदगीमे दू पक्षक बीच जमि कs मारिपीट भेल। सोशल मीडिया पर एहि घटनाक वीडियो वायरल भs रहल अछि, जाहिमे स्कूल परिसरक बाहर लोक एक-दोसरासँ मारि करैत देखल जा रहल अछि।
एहि झड़पमे स्कूलक हेडमास्टर (एचएम) केर बेटा आ स्थानीय ग्रामीण घायल भs गेल अछि।
स्थानीय ग्रामीणक कहब छनि जे एहि चुनावमे हेडमास्टर ललन वर्मनक बेटा सेहो मौजूद छलाह, जे कोनो खास उम्मीदवारकेँ फायदा पहुंचेबाक उद्देश्यसँ ओतय मौजूद छलाह, जखनि किछ लोक हुनकर उपस्थितिक विरोध कयलक तs एक पक्ष हंगामा करय लागल, एहि विरोधमे मामिला एतेक बढ़ि गेल जे झड़प झगड़ामे बदलि गेल। गामक लोक ई सवाल उठेलक जे जँ एचएमक बेटा चुनावसँ संबंधित नहि छल तखनि ओ किएक मौजूद छल ?
ग्रामीण ओ अभिभावकगण हेडमास्टर ललन वर्मन पर कतेको गंभीर आरोप लगौने छथि। ओ सब कहैत छथि जे स्कूलमे किताबक नाम पर छात्रसँ 500 टका वसूली होइत अछि। विरोध करैत अछि तs बच्चा सबकेँ स्कूलसँ निकालि देल जाइत अछि। महिला अभिभावक सेहो हेडमास्टर पर लापरवाही आ अनियमितताक आरोप लगौने छथि। ओ सब कहलनि जे, स्कूल समय पर नहि खुजैत अछि आ मिड डे मील योजनामे सेहो भारी गड़बड़ी भs रहल अछि।
हंगामाक दौरान भारी संख्यामे ग्रामीण स्कूल परिसरक बाहर हेडमास्टरक खिलाफ नारा लगओलनि, स्थितिकेँ देखैत मौका पर पुलिस बल पहिनेसँ तैनात छल, मुदा पुलिसक सामने दुनू पक्षमे झड़प भs गेल। ई वीडियो सोशल मीडिया पर वायरल भs गेल अछि।
घटनाक संबंधमे दरहर थाना प्रभारी जितेंद्र कुमार कहलनि जे, चुनावक लेल पुलिस बल पहिनेसँ तैनात अछि। मुदा एहि दौरान दू दलक बीच झड़प भs गेल, जाहिमे किछु लोक घायल भs गेल। ओ कहलनि जे, एखनि धरि एहि मामिलामे कोनो लिखित शिकायत नहि आयल अछि, मुदा आवेदन भेटलाक बाद आगुक कारवाई कयल जायत।
उल्लेखनीय अछि जे हालहिमे एहि जिलाक महिसी प्रखंड क्षेत्रक एकटा स्कूलसँ छात्र द्वारा नदीमे किताब फेकबाक मामिला सामने आयल छल। ओ विवाद एखनि धरि पूर्ण रूपेण शांत नहि भेल छल आ आब शिक्षा समितिक चुनावमे एहि प्रकारक हिंसासँ शिक्षा विभागक कार्यशैली आ जमीनी स्थिति पर सवाल ठाढ़ भs गेल अछि।
