मधुबनीमे शनिदिन ओहि समय अफरा-तफरी मचि गेल जखनि सिंगयाही पुपरी निवासी फेंकन मुखिया आ सचिनक पुलिस गाड़ीक चपेटमे आबि कs मृत्यु भs गेल। ई जानकारी भेटला पर गामक लोक आक्रोशित भs गेल आ सड़क पर उतरि मुख्य सड़क केर जाम कs देलक।
घटनाक करीब तीन घंटा बाद माधवपुर आ सहरघाट पुलिस मौका पर पहुंचल। ई देखि आक्रोशित गामक लोक ईंटा-पाथर फेकय लागल। ग्रामीणक कहब अछि जे पुलिस पिस्तौलसँ हवामे पांच राउंड हवाई फायरिंग कयलक। मुदा पुलिस एक राउंड फायरिंगक पुष्टि कयलक अछि।
ताधरि बेनीपट्टीक डीएसपी अमित कुमार सेहो ओतय पहुँचि गेलाह। ओ गामक लोकसँ गप करैत दोषी पुलिस अधिकारीक खिलाफ कारवाईक आश्वासन देलनि। एकर बाद सड़क जाम समाप्त भेल।
जनतबक अनुसार डायल 112 केर गाड़ी शराबसँ भरल हेबाक संदेहमे बाइकक पीछा कs रहल छल, जाहि दौरान पुलिसक गाड़ी एकटा बाइक केर ठोकर मारलक, जाहिसँ बाइक पर सवार एकटा युवकक मौका पर मृत्यु भs गेल, जखनिकि एकटा आओर 10 सालक बच्चा गंभीर रूपसँ घायल भs गेल। घटनाक बाद पुलिसकर्मी गाड़ीक संग ओहि ठामसँ निकलि गेल, जखनि कि गामक लोक आनन-फाननमे घायल केर इलाजक लेल सीएचसी लs गेल, जतय ओकर मृत्यु भs गेल।
मधुबनीक पुलिस अधीक्षक योगेन्द्र कुमार कहलनि जे, ई एकटा गंभीर घटना अछि जाहिमे दू गोटेक मृत्यु भs गेल अछि। ई घटना माधवपुर थाना क्षेत्रमे भेल अछि, जतय डायल 112 गाड़ी एकटा बाइक केर रोकयकेँ कोशिश कयलक जाहि पर दू गोटे सवार छल आ शराब लs कs जा रहल केर आशंका छल।
एसडीपीओ बेनीपट्टी मौका पर पहुंचि कs स्थिति पर काबू पओलनि। डायल 112 केर अधिकारी एएसआई चंद्रमोहन सिंहक खिलाफ शिकायत दर्ज कराओल गेल अछि, एएसआई चंद्रमोहन सिंहकेँ निलंबित कs देल गेल अछि। एकर संग-संग पुलिस प्राथमिकी दर्ज कs जांच शुरू कs देलक अछि। शवकेँ पोस्टमार्टमक लेल सदर अस्पताल मधुबनी भेजल गेल अछि।. फिलहाल स्थिति सामान्य अछि।
