गया केर इमामगंजमे शुक्रदिन पुलिसक पेट्रोलिंग गाड़ीसँ एकटा व्यक्तिक मृत्यु भ’ गेल। घटनाक बाद आक्रोशित ग्रामीण लोकनि सड़क जाम क’ क’ बहुत समय तक हंगामा क’ देलक आ पुलिसक गाड़ीकेँ आगि लगा देलक। मृतकक पहिचान मेघास्थान गामक निवासी देवबली उर्फ बाबू चौधरी केर रूपमे भेल अछि।
जानकारी अनुसार व्यक्तिक मृत्युक बाद आक्रोशित लोक पुलिस पर पत्थरवाजी क’ देलक। जाहिमे दू टा पुलिसकर्मी घायल भेलाह। तैयो पुलिसक गाड़ीमे आगि लगाओल गेल।
बताओल जा रहल अछि जे देवबली नामक व्यक्ति गामक ईंट भट्ठाक’ नजदीक ठाढ़ छल। ताहि समय कोठी थाना’ पुलिसक पेट्रोलिंग गाड़ी ओतय पहुँचल। पुलिसकेँ देखिते देवबली भाग’ लागल। पुलिसकेँ संदेह भेल जे ओ शराब ल’ जा रहल अछि। आ पुलिस ओकर पीछा करय लागल। भागबाक क्रममे बाइक सवार देवबली असंतुलित भ’ क’ खसि पड़ल। तखनहिं पाछूसँ आबि रहल पुलिस वाहन ओकरा ठोकर मारि देलक, जाहिमे घटनेस्थल पर ओकरे मृत्यु भऽ गेल। ई देखिकय स्थानीय गामवासी आक्रोशित भऽ गेलाह आ सड़क जाम कय हंगामा करय लागल।
गामवासी विनय कुमार कहलनि कि पुलिस वाहन तेज रफ्तारमे छल। शराबक संदेह पर पीछा कएल गेल, जखनि कि मृतक लगसँ शराब सेहो बरामद नहिं भेल अछि। शराबक संदेहमे पुलिस पिछा करि रहल छल।
कोठी थाना अध्यक्ष संजीत कुमार कहलनि कि पुलिस शराब कारोबारक संदेहमे देवबलीक पीछा करि रहल छल। चूंकि पुलिस बलकेँ देखि ओ बाइकसँ तेजीसँ भागय लागल। ताहिमे ई हादसा भेल अछि। आक्रोशित गामवासीकेँ शांत कराओल जा रहल अछि। ओतहि पुलिस शवकेँ पोस्टमार्टमक लेल अनुग्रह नारायण मगध मेडिकल कॉलेज अस्पताल पठाबयक प्रयास कय रहल छल। थाना अध्यक्ष संजीत कुमारक कहब अछि जे दोषीक खिलाफ कारवाई कएल जायत।
