प्रशांत किशोर नीतीश सरकार पर हमला कयलनि अछि। ओ कहलनि, “जँ नीतीश कुमार बिहारमे लोकतंत्रकेँ लाठीतंत्रमे बदलय चाहैत छथि तऽ इ नहि होबए देल जायत।”
पटना पुलिस शुक्र दिन (२७ दिसंबर) भोरमे प्रशांत किशोरक घर पहुँचल। दरअसल, बृहस्पति (२६ दिसंबर) केँ प्रशांत किशोर कहने छलाह जे जँ उम्मीदवार मार्च करैत छथि तऽ ओ हुनका संग अओताह। ओ सभ लाठी खएबाक लेल आगाँ रहताह। पुलिस पहुँचलाक बाद संवाददाता सभसँ बातचीत करैत प्रशांत किशोर बतौलनि जे पुलिस हुनक घर किएक पहुँचल अछि।
प्रशांत किशोर कहलनि, “ओ सभ घबरा गेल छथि जे कहीं हमसभ मार्च पर नहि निकलि जाए। प्रशासन दहशतमे आबि गेल अछि। जँ हुनका लग कोनो भय नहि अछि, कोनो मतलब नहि अछि वा कोनो मामिला नहि अछि, तखनि ओ पुलिस प्रशासनकेँ किएक लगा रहल छथि ? हम सरकारसँ आग्रह करब जे छात्रक समस्या पर ध्यान देल जाय। जँ अहाँ (मुख्यमंत्री) अपने भेंट नहि कऽ सकैत छी तऽ एकटा प्रतिनिधिमण्डल बनाउ जे छात्रक मांग सभ पर बातचीत करय। ई चारि लाख छात्रक जीवनक प्रश्न अछि। ओ सभ अईठाम धरना पर बैसल छथि। हुनका लग भोजन वा रहबाक व्यवस्था नहि अछि। अहां अईठाम बंगलामे बैसल आदेश जारी कए रहल छी। लाठी चलवा रहल छी। जँ एहेन होइत अछि तखन एकदम प्रतिरोध होयत।”
प्रशांत किशोर कहलनि, “ढाई सालसँ हम बिहारमे छी, गाम-गाममे घूमि रहल छी, मुदा हम कहियो कोनो प्रदर्शन वा मार्चमे भाग नहि लैत छी। काल्हि (गुरुवार) हम ओतए मात्र ई देखबा लेल गेलहुँ जे छात्रक संग की समस्या छल। जाहि तरहें सड़कपर हुनका बेरहमीसँ मारल गेल, एकटा गरीब घरक बच्चा सोनू आत्महत्या कऽ लेलक। एहि पर सरकार दिससँ कोनो बयान नहि आयल अछि आ ने ओहि परिवारक मदति करबाक कोनो प्रयास कयल गेल अछि। हमरा कहल गेल अछि जे पीएमसीएचमे एखनो चारिटा बच्चा भर्ती अछि जे पुलिसक लाठीसँ घायल भऽ गेल छल। हम काल्हि एहि भावनाक संग गेलहुँ जे छात्रसभकेँ असगर महसूस नहि करबाक चाही।”
ओ आगू कहलनि, “जँ नीतीश कुमार बिहारमे लोकतंत्रकेँ लाठीतंत्रमे बदलय चाहैत छथि तऽ इ नहि होबए देल जायत।अगिला बेर जखनि छात्र सड़क पर ठाढ़ होयत, प्रशांत किशोर, जन सुराज आ हमर सभक सभ साथी लोकतंत्रक एहि भावनाक सम्मान करैत हम पूरा ताकतसँ छात्रक संग ठाढ़ होएब।”
प्रशांत किशोर आगू कहलनि, “हर दोसर दिन लाठी चलि रहल अछि आ नीतीश कुमारकेँ जानकारी तक नहि अछि। जखनि कखनो छात्र मार्च पर निकलैत छथि, जँ मार्च लोकतांत्रिक तरीकासँ होइत अछि, जँ शांतिपूर्ण तरीकासँ कयल जाइत अछि तखनि प्रशांत किशोर आ जन सुरराजक सहयोगी ओहि मार्चक नेतृत्व करय लेल एक संग चलत। हम देखय चाहैत छी जे पुलिस लाठी केना चलबैत अछि।
