नशेड़ी सभ पर पुलिसक नकेल कसय केर अभियान तेज

बेनीपुर समदिया
*

प्रशासन आब नशेड़ी सभकेँ पकड़य केर अभियान तेज कऽ देलक अछि। विभिन्न थानाक रिपोर्ट सभ भेटि रहल अछि। एहि क्रममे दरभंगा-मुजफ्फरपुर उच्च पथ पर शास्त्री चौक लग नशामे लड़खड़ाइत दुगो युवककेँ सिमरी थाना पुलिस गिरफ्तार कऽ न्यायिक हिरासतमे भेज देलक अछि। नशेड़ीकेँ सड़क पर लड़खड़ाइत घुमैत हेबाक जानकारी भेटतहि गश्तीमे निकलल सिमरी थाना पुलिस मौका पर पहुंचिकय दुनु नशेड़ी सिमरी निवासी मोनू राउत आ रवि कुमार मंडलकेँ पकड़ि लेलक। जांचक दौरान नशामे हेबाक पुष्टि होइतहि दुनुकेँ गिरफ्तार कऽ लेल गेल अछि। सिमरी थानाध्यक्ष मनीष कुमार बतेलनि जे नशेड़ीकेँ न्यायिक हिरासतमे भेज देल गेल अछि।

ओम्हर बहेड़ा थाना पुलिस विभिन्न गाम सभसँ छापामारी कय कऽ सातटा नशेड़ी आ एकटा वारंटीकेँ गिरफ्तार कय सभकेँ न्यायिक हिरासतमे भेज देलक। एहि संबंधमे थानाध्यक्ष चंन्द्रकांत गौड़ी बतेलनि अछि जे नशेड़ी विश्वविद्यालय थाना क्षेत्रक कैदराबाद निवासी महेश साह, बहेड़ा थाना क्षेत्रक आशापुर बसौलीसँ इबरान, रवि चौपाल, छोटू चौपाल, चौगमाक लक्ष्मी साफी, बहेड़ाक दीप नारायण साह, अमर कानू आ वारंटी रमौली गामक संतोष मिश्रकेँ गिरफ्तार कय न्यायिक हिरासतमे भेज देल गेल अछि।