मदरसामे पुलिसक पैघ कारवाई, लोडेड पिस्टल बरामद आ मदरसा सील
पूर्वी चंपारण । समदिया
बिहारक पूर्वी चंपारण जिलामे चकिया थाना क्षेत्रक गवंद्रामे स्थित एकटा मदरसामे पुलिसक विशेष टीम गुप्त सूचना केर आधार पर छापेमारी कऽ एकटा लोडेड पिस्टल बरामद कयलक। पुलिस कप्तान (SP) स्वर्ण प्रभातक निर्देश पर भेल एहि त्वरित कारवाईक बाद मदरसाकेँ तुरत प्रभावसँ सील कऽ देल गेल। एहि मदरसाक पुरान संबंध प्रतिबंधित संगठन PFI (पॉपुलर फ्रंट ऑफ इंडिया) सँ रहल अछि, जाहिसँ क्षेत्रमे कोनो पैघ आतंकवादी वा आपराधिक साजिशक संकेत भेटि रहल अछि।
पुलिसकेँ ठोस जानकारी भेटल जे गवंद्रा केर एहि मदरसाक भीतर अवैध हथियारक जखीरा नुकाओल गेल अछि आ कोनो पैघ घटना करेबाक तैयारी चलि रहल अछि। सूचना भेटिते अनुमंडल पुलिस पदाधिकारी आ थानाध्यक्ष केर नेतृत्वमे भारी पुलिसबल मदरसाक घेरेबंदी कऽ सघन तलाशी शुरू कयलक। कमराक तलाशीक दौरान जखनि लोडेड पिस्टल हाथ लागल, पुलिस स्थल पर मौजूद तीन संदिग्धकेँ हिरासतमे लेलक।
तीनूसँ फिलहाल गुप्त स्थान पर पूछताछ कयल जा रहल अछि ताकि ई पता लगि सकए कि मदरसाकेँ हथियारक अड्डा बनेबाक पाछा मुख्य मास्टरमाइंड के अछि। ई पहिल बेर नहि अछि जखनि ई मदरसा विवादक घेरामे आयल अछि। सुरक्षा रिकॉर्डक अनुसार, ई वैऽह मदरसा अछि जतयसँ चकिया पुलिस आ एसटीएफ (STF) पूर्व मे PFI केर सक्रिय सदस्य उस्मान उर्फ सुल्तान उर्फ याकूबकेँ गिरफ्तार कयने छल प्रतिबंधित संगठन PFI केर पुरान लिंक आ फेरसँ हथियार भेटलाक बाद जांच एजेंसीकेँ शंका अछि जे एतय स्लीपर सेल वा कोनो नव मॉड्यूलकेँ सक्रिय बनेबाक कोशिश कयल जा रहल छल।
एसपी स्वर्ण प्रभात स्पष्ट कयने छथि जे राष्ट्रविरोधी गतिविधिमे संलग्न कोनो संस्थान वा व्यक्तिकेँ नहि बक्सल जाए. हिरासतमे लेल गेल तीनु संदिग्धक निशानदेही पर पुलिसक अलग-अलग टीम जिलाक कतेको अन्य संभावित ठाममे छापेमारी कय रहल अछि। पुलिस ई जानय केर कोशिश कय रहल अछि जे ई पिस्टल कतयसँ आनल गेल आ एकरा मदरसामे राखबाक असली उद्देश्य की छल। पूरा चकिया क्षेत्रमे सुरक्षा व्यवस्था कड़ा कय देल गेल अछि आ खुफिया तंत्रकेँ सक्रिय कय देल गेल अछि। पुलिसक मानब अछि कि पुछताछमे किछु आर पैघ नामक खुलासा भऽ सकैछ, जे पर्दाक पाछूसँ एहि नेटवर्ककेँ संचालित कऽ रहल अछि।
