संसदक मानसून सत्रक पहिल दिन काफी उथल-पुथल छल। सरकार आ विपक्ष विभिन्न मुद्दा पर एक दोसर पर आरोप लगाबैत देखल गेल। एकर संगहि काल्हि संसद भवनमे प्रधानमंत्री नरेंद्र मोदीक अध्यक्षतामे उच्च स्तरीय बैसार सेहो आयोजित कयल गेल। एहि बैसारमे केंद्रीय गृहमंत्री अमित शाह, रक्षा मंत्री राजनाथ सिंह, भाजपा अध्यक्ष आ केंद्रीय स्वास्थ्य मंत्री जेपी नड्डा, वित्त मंत्री निर्मला सीतारमण, कानून मंत्री अर्जुन मेघवाल, संसदीय मामिला केर मंत्री किरेन रिजिजू आ कृषि मंत्री शिवराज सिंह चौहान सहित कतेको अन्य मंत्री शामिल छलाह।
सूत्रक अनुसार ई बैसार संसद सत्रक संबंधमे भेल छल, जाहिमे सत्रक रूपरेखा, विधायी एजेंडा आ विपक्षक संग संभावित रणनीति पर चर्चा भेल छल। मानल जा रहल अछि जे सरकार एहि सत्रमे किछु महत्वपूर्ण विधेयक पेश आ पारित करबाक तैयारीमे अछि। एहि बैसारमे संसदक कार्यवाही केर सुचारू रूपसँ संचालन आ कतेको मंत्रालयक समन्वय पर सेहो विचार कैल गेल। मुदा बैसारक एजेंडा पर सरकारक दिसिसँ कोनो आधिकारिक बयान नहि आयल अछि।
जनतब दी जे प्रधानमंत्री नरेंद्र मोदी 23-24 जुलाईकेँ ब्रिटेनक आधिकारिक यात्रा पर रहताह। प्रधानमंत्री मोदी केर ई ब्रिटेनक चारिम आधिकारिक यात्रा होयत। ब्रिटेनक बाद पीएम मोदी मालदीवक आधिकारिक यात्रा पर जेताह जे 25-26 जुलाई 2025 केँ होयत। प्रधानमंत्री मोदी मालदीव केर राष्ट्रपति डॉ. मोहम्मद मोइज्जू केर आमंत्रण पर मालदीव जा रहल छथि। प्रधानमंत्री केर मालदीवक ई तेसर यात्रा होयत।
