आरएसएस प्रमुख मोहन भागवत कहलनि जे जखनि अहां 75 सालक भऽ जाएब तऽ लोक अहाकेँ शाल ओढ़ाबय लगैत अछि। मतलब जे अहाँक उम्र भऽ गेल अछि। आब साइड भऽ जाऊ।
मोहन भागवतक बयानकेँ विपक्षी दलक नेता सभ लपकि लेलक। विपक्ष कहलक जे भागवतक ई बयान पीएम मोदीक संदर्भमे अछि।
लोकसभा चुनाव 2024 केर बाद राष्ट्रीय स्वयंसेवक संघक सरसंघचालक मोहन भागवत लगातार एहेन बयान दऽ रहल छथि, जाहिसँ भाजपा असहज भऽ रहल अछि। एक बेर फेर संघ प्रमुख (आरएसएस प्रमुख) 75 सालक उम्र सीमाक संबंधमे बयान देलनि अछि। संघ प्रमुख कहलनि जे, 75 सालक उम्र पहुंचलाक बाद दोसरकेँ मौका देल जयबाक चाही। 75 साल पूरा भेला पर जखनि अहांकेँ शाल भेंट कएल जाइत अछि तऽ एकर मतलब अछि जे अहांक उम्र भऽ गेल अछि। अहाँकेँ आब एक कात हटि जेबाक चाही। भागवत ई बात राम जन्मभूमि आन्दोलनक पाछुक प्रेरणा स्वर्गीय मोरोपंत पिंगले पर लिखल गेल पुस्तकक विमोचनक अवसर पर कहलनि।
शिवसेना (उद्धव) केर नेता संजय राउत कहलनि जे, पीएम मोदी लाल कृष्ण आडवाणी, मुरली मनोहर जोशी, जसवंत सिंह सन पैघ नेताकेँ सेवानिवृत्त करय लेल मजबूर कयने छलाह। आब देखल जाय जे पीएम मोदी स्वयं एकर पालन करताह कि नहि। एहिसँ पहिने आम आदमी पार्टी सेहो कतेको बेर कहलक जे भाजपा 75 सालक समय सीमा तय कयलक अछि। पीएम मोदी एहि साल 17 सितंबरकेँ 75 सालक भ जेताह। भ’ सकैछ जे ओ रिटायर भ’ जाइथ।
मोहन भागवतक एहि बयान पर कांग्रेस पीएम मोदी पर हमला कयलक। कांग्रेस नेता जयराम रमेश कहलनि जे पीएम मोदी घर वापसी करताह, भागवत हुनका मोन पाड़लखिन जे 17 सितंबर 2025 केँ 75 सालक भऽ जेताह, एहि पर पीएम मोदी इहो जवाब द सकैत छथि जे भागवतक उम्र 11 सितंबर 2025 केँ सेहो 75 साल होबय वाला अछि, एक तीर, दू टा लक्ष्य!
भाजपाक भीतर एकटा निश्चित उम्र धरि कोनो पद पर रहय केर संबंधमे कोनो आधिकारिक नियम नहिं अछि। किछु स्तर पर पार्टी समय सीमा तय कयलक अछि। छत्तीसगढ़मे भाजपा मंडल अध्यक्ष पद लेल 35 सँ 45 साल आ जिला अध्यक्ष पद लेल 45 सँ 60 सालक उम्र सीमा तय कयल गेल अछि।
भाजपा 2019 केर लोकसभा चुनावमे 75 सालसंँ बेसी उम्रक कतेको वरिष्ठ नेताकेँ टिकटसँ मना कऽ देलक। एहिमे लाल कृष्ण आडवाणी, मुरली मनोहर जोशी, सुमित्रा महाजन, कलराज मिश्र सन बहुत रास शक्तिशाली नेता शामिल छलाह । दरअसल, 2014 मे भाजपाक सत्तामे अबैत देरी 75 सालसँ ऊपर केर नेताक सेवानिवृत्त करबाक प्रवृत्ति शुरू भऽ गेल। पार्टी सलाहकार बोर्डमे वरिष्ठ नेताकेँ शामिल कयल गेल। गुजरातमे सेहो उम्रक मापदंडक ध्यान राखि आनंदी बेनक इस्तीफा लेल गेल। नजमा हेपतुल्लाह जखनि मंत्रिमंडलसँ इस्तीफा देलनि तऽ हुनकर उम्र सेहो 76 साल छल। 2024 केर लोकसभा चुनावमे राजेन्द्र अग्रवाल, संतोष गंगवार, सत्यदेव पचौरी, रीता बहुगुणा जोशीक टिकट सेहो 75 सालसँ बेसी उम्रक कारण काटि देल गेल छल।
पिछला साल लोकसभा चुनावक दौरान विपक्षी नेता खास कऽ आम आदमी पार्टी एहि कथ्यकेँ सेट करयकेँ कोशिश कयलनि जे पीएम मोदीक उम्र 2025 मे 75 साल भऽ जाएत आओर रिटायर भऽ जाएत, ताहि लेल एकर जवाब देबय लेल खुद अमित शाहकेँ सामने आबय पड़ल। केंद्रीय गृहमंत्री अमित शाह कहलनि जे, हम स्पष्ट करय चाहैत छी जे भाजपामे एहेन कोनो प्रावधान नहि अछि। पीएम मोदी साल 2029 मे देशक नेतृत्व करताह, संगहि पार्टी अध्यक्ष जेपी नड्डा सेहो कहलनि जे भाजपाक संविधानमे कतहु उम्रक संबंधमे एहेन कोनो प्रावधान नहि अछि। पीएम मोदी हमर नेता छथि। भविष्यमे सेहो ओ हमरा सभक नेतृत्व करताह।
