पीएम मोदी मंगलकेँ गुजरातक वाव-थराडमे करीब 20 हजार करोड़ रुपैयाक परियोजनाक कयलनि शुरुआत

गांधीनगर । समदिया

पीएम मोदी मंगलकेँ गुजरातक वाव-थराडमे करीब 20 हजार करोड़ रुपैयाक परियोजनाक शुरुआत कयलनि। एहि अवसर पर आयोजित जनसभाकेँ संबोधित करैत कहलनि जे हालहिमे पावन नवरात्रि पर्व सम्पन्न भेल अछि आ माँ अम्बाजीक कृपासँ हुनका एहि पवित्र धरती पर आबयकेँ अवसर भेटल अछि। प्रधानमंत्री सभामे उपस्थित लोकसभकेँ संबोधित करैत कहलनि, “हम माँ अम्बाजीक चरणमे प्रणाम करैत छी। आइ भगवान महावीर जयंती सेहो अछि। ई क्षेत्र अनेक जैन तीर्थक धरती अछि। हम भगवान महावीरकेँ प्रणाम करैत छी आ सभ लोककेँ एहि पावन अवसर पर बधाई दैत छी।” ओ कहलनि जे डीसा एयरबेस पर पहिल बेर हुनकर विमान उतरल, जे अन्तरराष्ट्रीय सीमासँ मात्र 130 किलोमीटर दूर अछि। हुनकर अनुसार ई एयरबेस देशक सुरक्षा लेल अत्यंत महत्वपूर्ण अछि। ई परियोजना केर सोच ओहि समयसँ रहल अछि जखनि ओ गुजरातक मुख्यमंत्री छलाह। किसानसभक सहयोगसँ जमीन उपलब्ध भेल आ आब ई एयरबेस पश्चिमी सीमा सुरक्षाकेँ मजबूत करत। प्रधानमंत्री आरोप लगेलनि जे पूर्ववर्ती केंद्र सरकारक कारण एहि परियोजनामे देरी भेल, मुदा आब डीसा एयरबेस केवल हवाई पट्टी नहि, बल्कि क्षेत्रक समग्र विकासक गति देत। एहिसँ रोजगार आ अन्य गतिविधिमे वृद्धि होएत। ओ कहलनि जे वाव-थराड आ बनासकांठा क्षेत्रसँ हुनकर विशेष लगाव रहल अछि। केंद्र आ राज्य सरकारक संयुक्त प्रयाससँ करीब 20 हजार करोड़ रुपैयाक परियोजना शुरू कएल गेल अछि, जाहिसँ पूरा इलाका केर तस्वीर बदलत। ऊर्जा क्षेत्र पर जोर दैत प्रधानमंत्री कहलनि जे गुजरात सौर ऊर्जा उत्पादनमे देशमे अग्रणी अछि। वर्ष 2010 मे मुख्यमंत्री रहलाक दौरान ओ देशक पहिल सोलर पार्क शुरू करबाक पहल कयलनि, जाहिसँ आई राज्य नवीकरणीय ऊर्जा क्षेत्रमे अग्रसर भेल अछि। खावड़ा रिन्यूएबल एनर्जी पार्क जेकाँ परियोजना भविष्यमे गुजरातकेँ वैश्विक ऊर्जा केंद्र बनाबयमे मदद करत। प्रधानमंत्री उत्तर गुजरातक पुरान स्थितिकेँ याद करैत कहलनि जे एक समय ई क्षेत्र सूखा आ पानिक संकटसँ जूझैत छल, मुदा आब सड़क, हाईवे आ वंदे भारत ट्रेन जेकाँ सुविधासँ क्षेत्रक तेजीसँ विकास भेल अछि। अंतरराष्ट्रीय स्थिति पर टिप्पणी करैत ओ कहलनि जे विश्वक कएकटा देश युद्ध आ अस्थिरतासँ जुझि रहल अछि, विशेष रूपसँ पश्चिम एशियामे संकटक असर ऊर्जा आपूर्ति पर पड़ि रहल अछि। एहेन परिस्थितिमे भारत अपन स्थिरता बनेने रखबाकमे सफल रहल अछि, जे प्रभावी विदेश नीति आ देशक एकताक परिणाम अछि। राजनीतिक दलसभ पर निशाना साधैत प्रधानमंत्री कांग्रेस पर आरोप लगेलनि जे ओ कठिन समयमे विभाजनकारी राजनीति कए रहल अछि आ देशमे अफवाह पसारयक प्रयास कए रहल अछि। अंतमे ओ कहलनि जे जनताक भरोसा बनल रहल तऽ विकासक रफ्तार एहिना तेजीसँ आगाँ बढ़ैत रहत।