प्रधानमंत्री नरेंद्र मोदी आईसँ 19 जून धरि कनाडा, साइप्रस आ क्रोएशिया केर आधिकारिक यात्रा पर जायवाला छथि। प्रधानमंत्री कनाडामे होबयवला जी-7 शिखर सम्मेलनमे भाग लेताह, जे भारत केर वैश्विक कूटनीतिक संबंधकेँ मजबूत करय केर दिशामे एगो महत्वपूर्ण कदम होयत। ई यात्रा भारतक अंतरराष्ट्रीय संबंधकेँ नव ऊंचाई पर पहुँचाबयवला अछि।
मोदी कनाडाक प्रधानमंत्री मार्क कार्नीक आमंत्रण पर कनानास्कीमे जी-7 शिखर सम्मेलनमे भाग लेताह।
ई हुनक छठम जी-7 भागीदारी होयत। ओ जी-7 देश, अन्य आमंत्रित देश आ अंतर्राष्ट्रीय संगठनक नेतासँ ऊर्जा सुरक्षा, तकनीक, आर्टिफिशियल इंटेलिजेंस (एआई) आ क्वांटम जेहन वैश्विक मुद्दा पर चर्चा करताह। एहि दौरान कतेको द्विपक्षीय बैसार सेहो होएत।
साइप्रसक राष्ट्रपति निकोस क्रिस्टोडौलिड्सक आमंत्रण पर पीएम मोदी 15-16 जूनकेँ साइप्रसक दौरा करताह। 20 साल बाद भारतीय प्रधानमंत्रीक साइप्रसक इ पहिल यात्रा होएत। निकोसियामे राष्ट्रपति क्रिस्टोडौलिड्स केर साथ द्विपक्षीय बातचीत करताह आ लिमासोलमे व्यापारिक नेता सिनीकेँ संबोधित करताह। ई यात्रा भारत-साइप्रस संबंधकेँ मजबूत करत आ यूरोपीय संघ आ भूमध्यसागरीय क्षेत्रक संग सहयोग बढ़ाबयमे महत्वपूर्ण होयत।
क्रोएशिया केर प्रधानमंत्री आंद्रेय प्लेनकोविच केर आमंत्रण पर मोदी 18 जूनकेँ क्रोएशियाक दौरा करताह। भारतीय प्रधानमंत्री केर ई क्रोएशिया केर पहिल यात्रा होयत, जे दुनू देशक बीच संबंधमे ऐतिहासिक होयत। ओ प्रधानमंत्री प्लेनकोविचसँ बातचीत करताह आओर राष्ट्रपति ज़ोरन मिलानोविचसँ भेंट करताह। एहि यात्रासँ यूरोपीय संघक संग भारत केर संबंध आओर मजबूत होयत।
विदेश मंत्रालयक अनुसार ई यात्रा भारतक वैश्विक कूटनीतिक संबंधकेँ एकटा नव दिशा देत। साइप्रस आर क्रोएशियाक संग पहिल बेर भऽ रहल ई यात्रा व्यापार, संस्कृति आ सामरिक सहयोगकेँ बढ़ावा देत। जी-7 शिखर सम्मेलनमे भारतक प्रभावी भूमिका पर फेरसँ वैश्विक मंच पर प्रकाश देल जायत।
