प्रधानमंत्री नरेंद्र मोदी देशक राज्य सभक लगातार दौरा कय रहल छथि आ ओहिठामक जनताकेँ सौगात दऽ रहल छथि। एहि कड़ीमे पीएम मोदी लगातार पाँच राज्यक दौरा पर रहताह। ओ तीन दिनक भीतर पाँच अलग-अलग राज्य जयताह, जतय ओ कतेको रैली आ सभाकेँ संबोधित करताह।
पीएम मोदी 29 मईकेँ पहिल बेर सिक्किम जयताह, जतय ओ ‘सिक्किम@50: जहाँ प्रगति उद्देश्य से मिलती है और प्रकृति विकास को पोषित करती है’ कार्यक्रममे हिस्सा लेताह। सिक्किममे प्रधानमंत्री मोदी कतेको विकास परियोजनाक आधारशिला रखताह आ ओकर उद्घाटन करताह। एहिमे नमची जिलाक 750 करोड़ रुपयासँ अधिक लागत वला 500 बिस्तरक नव जिला अस्पताल, गंगटोक जिलाक संगखोलामे अटल अमृत उद्यानमे भारत रत्न अटल बिहारी वाजपेयी केर प्रतिमाक स्थापना, सिक्किमक 50 वर्ष पूरा होयबाक अवसर पर स्मारक सिक्का, स्मृति सिक्का आ डाक टिकट सेहो जारी कएल जायत। एहि दौरान प्रधानमंत्री एकटा सभाकेँ सेहो संबोधन करताह।
एकर बाद प्रधानमंत्री मोदी ओहि दिन 2:15 बजे अलीपुरद्वार आ कूचबिहार जिलामे सिटी गैस डिस्ट्रीब्यूशन (सीजीडी) परियोजनाक आधारशिला रखताह। एकर अलावा, पश्चिम बंगालक कतेको दोसर योजनाक सौगात देलाक बाद प्रधानमंत्री बिहार रवाना हेताह। एहि ठाम ओ पटनामे एयरपोर्टसँ भाजपा मुख्यालय धरि एकटा विराट रोड शो करताह। 29 मईकेँ साँझ लगभग 5:45 बजे पटना एयरपोर्टक नव टर्मिनल भवनक उद्घाटन करताह।
पटनामे राति भरि रुकलाक बाद प्रधानमंत्री 30 मईकेँ भोर 11 बजे बिहारक रोहतास जिलाक काराकाटमे 48,520 करोड़ रूपया केर योजनाक सौगात देताह। ओहिठाम ओ एकटा सार्वजनिक समारोहकेँ सेहो संबोधित करताह। बिहार यात्रा पर 48,520 करोड़ रूपयाक कतेको विकास परियोजनाक उद्घाटन करताह।
एकर बादमे पीएम मोदी यूपी यात्रा पर रवाना होएताह। ओहिठाम ओ लगभग 20,900 करोड़ रूपयाक कतेको परियोजनाक आधारशिला रखताह। पीएम मोदी कानपुरक सीएसए ग्राउंडमे एकटा जनसभा सेहो करताह।
एहि केर अलावा, प्रधानमंत्री मोदी 31 मईकेँ मध्य प्रदेशक दौरा पर जयताह। सीएम मोहन यादव एक्स पर एकटा पोस्ट शेयर कय बतौने छथि जे पीएम मोदी 31 मईकेँ भोपालमे लोकमाता देवी अहिल्याबाई होलकरक 300वीं जयंती पर आयोजीत महिला सशक्तिकरण कार्यक्रम आ महिला सम्मेलनमे सहभागी हेताह। ताहि परिप्रेक्ष्यमे मध्य प्रदेश सरकारक कैबिनेट मंत्री कैलाश विजयवर्गीयक अनुसार, 31 मईकेँ पीएम मोदीक मध्य प्रदेश दौरा अछि। एतय वर्चुअली इंदौर मेट्रो ट्रेनक सौगात देताह। सतना आ दतियामे नव निर्मित एयरपोर्टक उद्घाटन करताह।
