दुबईक क्राउन प्रिंस, संयुक्त अरब अमीरात (यूएई) क डिप्टी पीएम आ रक्षा मंत्री शेख हमदान बिन मोहम्मद बिन राशिद अल मकतूम मंगलकेँ प्रधानमंत्री नरेंद्र मोदी संग भेंट कएलन्हि। ओ भारतक दू दिनक यात्रा पर मंगलकेँ नई दिल्ली पहुँचल छलथि। पीएम मोदी एक्स पर पोस्ट कएलन्हि, “दुबईक क्राउन प्रिंस महामहिम शेख हमदान बिन मोहम्मद बिन राशिद अल मकतूमसँ भेंट कए कऽ बहुत खुशी भेल। दुबई भारत-यूएई व्यापक रणनीतिक साझेदारीकेँ आगाँ बढ़ेबामे महत्वपूर्ण भूमिकाक निर्वाह कयलक अछि। ई विशेष यात्रा हमर गहिंर मित्रता केर पुष्टि करैत अछि आ भविष्यमे आरो मजबूत सहयोगक मार्ग प्रशस्त करत।”
ओतहि क्राउन प्रिंस एक्स पर लिखलन्हि, “आइ नई दिल्लीमे प्रधानमंत्री नरेंद्र मोदीसँ भेंट कए कऽ खुशी भेल। हमर बातचीत यूएई-भारत सम्बन्धक मजबूती केर पुष्टि कयलक, जे विश्वास पर आधारित अछि, ऐतिहासिकता द्वारा आकारित अछि, आ अवसर, नवाचार आ स्थायी समृद्धिक लेल साझा दृष्टिकोणसँ प्रेरित अछि।”
दुबई केर क्राउन प्रिंसक रूपमे शेख हमदान बिन मोहम्मद बिन राशिद अल मकतूमक ई पहिल आधिकारिक भारत यात्रा अछि आ हुनका संग कतेको मंत्री, वरिष्ठ सरकारी अधिकारी आ एक उच्च स्तरक व्यवसायिक प्रतिनिधिमंडल सेहो आएल अछि। प्रधानमंत्री मोदी गणमान्य अतिथिकेँ सम्मान देबाक लेल दुपहरियाक भोजक आयोजन कएलनि आ क्राउन प्रिंस विदेश मंत्री एस. जयशंकर आ रक्षा मंत्री राजनाथ सिंह संग सेहो बैठक सभ कएलनि।
एहिसँ पहिने विदेश मंत्री एस जयशंकर क्राउन प्रिंसकेँ स्वागत कएलन्ह। ओ एक्स पर लिखलनि, “दुबई केर क्राउन प्रिंस आ यूएई केर डिप्टी पीएम आ रक्षा मंत्री महामहिम शेख हमदान मोहम्मदकेँ भारतक पहिल आधिकारिक यात्राक दौरान स्वागत करैत हमरा अत्यंत खुशी भऽ रहल अछि। हमर व्यापक सहयोग आ जीवंत संबंधक लेल हुनकर सकारात्मक भावनाक प्रशंसा करैत छी।”
दिल्लीक बाद, क्राउन प्रिंस मुंबईक दौरा करताह आ दुनू पक्षक प्रमुख व्यापारिक नेता सभ संग एकटा व्यापार गोलमेज सम्मेलनमे भाग लेताह। एहि बातचीतसँ भारत-यूएई आर्थिक आ वाणिज्यिक सहयोग मजबूत होयत।
