प्रधानमंत्री नरेंद्र मोदीक मंगलदिन दुपहरियामे जेद्दा हवाई अड्डा पर भव्य स्वागत कएल गेल। पीएम मोदी सऊदी अरबक दु दिनक यात्रा पर पहुँचल छथि। हुनका 21 तोपक सलामी देल गेल आ एहि अवसर पर सऊदी अरबक एकटा व्यक्ति हुनका बॉलीवुड फिल्म ‘राजी’ केर गीत ‘ए वतन, मेरे वतन आबाद रहे तू’ गाबि कऽ सुनौलनि।
विदेश मंत्रालय एक्स पर लिखलक, “ऐतिहासिक बंदरगाह शहर जेद्दामे 21 तोपक सलामी आ औपचारिक स्वागत।
पीएम मोदी एकटा पोस्टमे लिखलनि, “सउदी अरबक जेद्दाहमे उतरि गेलौं। एहि यात्रासँ भारत आ सउदी अरबक बीच मित्रता आ मजबूती भेटत। आई आ काल्हि विभिन्न कार्यक्रमसभमे भाग लेबाक लेल उत्सुक छी।”
जनतब जे ई प्रधानमंत्रीक तेसर सउदी अरब यात्रा अछि, एहीसँ पहिने ओ 2016 आ 2019 मे सउदी अरबक दौरा कय चुकल छथि। प्रधानमंत्री नरेंद्र मोदीक प्लेनकेँ जेद्दामे लैंडिंगसँ पहिने सउदी एयर स्पेसमे रॉयल सउदी वायु सेनाक लड़ाकू विमान सभ एस्कॉर्ट कय रहल छल।
विदेश मंत्रालय ट्वीट कएलक, “मित्रताक ऊँच उड़ान! प्रधानमंत्री नरेंद्र मोदीक राजकीय यात्राक एकटा विशेष संकेतक रूपमे, हुनकर विमान सउदी हवाई क्षेत्रमे प्रवेश करैत काल रॉयल सउदी वायु सेना द्वारा एस्कॉर्ट कएल गेल।”
ई प्रधानमंत्री मोदीक ऐतिहासिक शहर जेद्दामे पहिल यात्रा अछि, जतय रणनीतिक साझेदारी परिषद (एसपीसी) केर दोसर बैठक होबय वाला अछि। द्विपक्षीय संबंध सभकेँ आगू बढ़ाबय खातिर अक्टूबर 2019 मे प्रधानमंत्री मोदीकेँ सऊदी अरबक पिछला राजकीय यात्राक दौरान एसपीसीक स्थापना कएल गेल छल। साँझकेँ भारतीय समय अनुसार, प्रधानमंत्री मोदी भारतीय समुदायक सदस्यक संग बातचीत करताह।
एहीसँ पहिने मंगलकेँ प्रस्थानसँ पूर्व पीएम मोदी कहला, ‘आई, हम क्राउन प्रिंस आ प्रधानमंत्री महामहिम प्रिंस मोहम्मद बिन सलमान केर निमंत्रण पर सऊदी अरबक दू दिवसीय राजकीय यात्रा पर जा रहल छी।’ प्रधानमंत्री कहला, “भारत सऊदी अरबक संग अपन पुरान आ ऐतिहासिक संबंधकेँ बहुत महत्त्व देलक अछि, जाहिमे हालक वर्ष सभमे रणनीतिक गहराई आ नव गति प्राप्त भेल अछि। संग मिलि कऽ, हम रक्षा, व्यापार, निवेश, ऊर्जा आ लोकक बीच संबंधक क्षेत्रमे आपसी लाभकारी आ ठोस साझेदारी विकसित कयलहुँ।” पीएम मोदी कहला, “पिछला एक दशकमे ई सऊदी अरबक लेल हमर तेसर यात्रा होयत आ ऐतिहासिक शहर जेद्दाक पहिल यात्रा।
प्रधानमंत्री मोदीकेँ 2016 मे सऊदी अरबक सर्वोच्च नागरिक सम्मानसँ सम्मानित कएल गेल छल।
