प्रधानमंत्री नरेन्द्र मोदी बृहस्पति दिन राज्यसभामे अपन मंत्रिपरिषदक परिचय देलनि। हुनका सङ्ग हुनकर कैबिनेट सहयोगी रक्षा मंत्री राजनाथ सिंह, गृह मंत्री अमित शाह, सड़क परिवहन मंत्री नितिन गडकरी आ अन्य मंत्री सेहो छलाह।
एहिसँ पहिने प्रधानमंत्री मोदी लोकसभामे अपन मंत्रिमण्डलक परिचय देने छलाह। वर्तमान सत्रमे बृहस्पति दिन राज्यसभाक पहिल बैसार छल। एहि बैसारमे जतय प्रधानमंत्री मोदी अपन मंत्रिमण्डलक परिचय देलनि। एकटा आओर महत्वपूर्ण निर्णयमे भाजपा अध्यक्ष जेपी नड्डाकेँ राज्यसभामे सदनक नेता नियुक्त कयल गेल।
राज्यसभाक सभापति जगदीप धनखड़ कहलनि जे हुनका ई सूचित करैत प्रसन्नता भऽ रहल अछि जे केन्द्रीय स्वास्थ्य आ परिवार कल्याण मंत्री जगत प्रकाश नड्डाकेँ राज्यसभामे सदनक नेता नियुक्त कयल गेल अछि। भाजपा अध्यक्ष जेपी नड्डासँ पहिने केन्द्रीय मंत्री पीयूष गोयल राज्यसभामे सदनक नेता छलाह। पीयूष गोयल एहि बेर मुम्बईसँ लोकसभा चुनाव लड़लनि आ जीतलाह। एहि कारणेँ आब ओ लोकसभाक सदस्य बनि गेल छथि।
तऽ जेपी नड्डाकेँ राज्यसभामे सदनक नेता नियुक्त कयल गेल अछि। एकटा खास बात इहो अछि जे राज्यसभामे जतय कांग्रेस अध्यक्ष मल्लिकार्जुन खड़गे विपक्षक नेता छथि, भाजपा अध्यक्ष जेपी नड्डा सदनक नेता बनि गेल छथि। हालक सालमे ई पहिल बेर अछि जखन कांग्रेस आ भाजपा अध्यक्ष राज्यसभामे प्रतिपक्षक नेता आ सदनक नेताक रूपमे आमने-सामने छथि। दुनू दलक अध्यक्ष राज्यसभाक सदस्य छथि।
मुदा, भाजपाकेँ जल्दिये जेपी नड्डाक स्थान पर नव अध्यक्ष भेटि सकैत अछि। एहन स्थितिमे ओ राज्यसभाक नेता सदन तऽ बनल रहताह, मुदा भाजपा अध्यक्ष नहिं रहताह।
