पीएम मोदी एडवांटेज असम २.० समिटमे कहलनि – ६ सालमे असमक अर्थव्यवस्था दुगुना

गुवाहाटी
*

प्रधानमंत्री नरेन्द्र मोदी मंगलदिन असमक गुवाहाटीमे एडवांटेज असम २.० समिट (शिखर सम्मेलन) केर उद्घाटन कयलनि। असमक मुख्यमंत्री हिमंत बिस्वा सरमाकेँ बधाई दैत ओ भारतक विकासमे पूर्वोत्तरक विकासपर सेहो प्रकाश देलनि। सम्मेलनकेँ सम्बोधित करैत पीएम मोदी भारतक बढ़ैत वैश्विक प्रभाव, मजबूत आर्थिक नीति आ भाजपाक डबल इंजन सरकारक अधीन असमक तीव्र विकासक चर्चा कयलनि।

भाजपा सरकारक अधीन राज्यक आर्थिक विकास दिसि इशारा करैत प्रधानमंत्री मोदी कहलनि जे पछिला छह सालमे रामक अर्थव्यवस्था दुगुना भऽ गेल अछि। “असमक योगदान बढ़ि रहल अछि। एडवांटेज असमक पहिल संस्करण २०१८ मे शुरू कयल गेल छल। ओहि समय असमक अर्थव्यवस्था लगभग २.७५ लाख करोड़ रुपैया छल, जे आब ६ लाख करोड़ रुपैया अछि। एकर अर्थ अछि जे भाजपा सरकारक अधीन छह सालमे असमक अर्थव्यवस्था दुगुना भऽ गेल अछि। ई डबल इंजन सरकारक दोहरा प्रभावकेँ देखबैत अछि।”

प्रधानमंत्री मोदी कहलनि, “असम २०३० धरि अपन अर्थव्यवस्थाकेँ १५० अरब बनयबाक लक्ष्य निर्धारित कयलक अछि आ हमरा विश्वास अछि जे असम एहि लक्ष्यकेँ प्राप्त कऽ सकैत अछि।” ओ आगू कहलनि, “आइ जखनि भारत विकास दिसि बढ़ि रहल अछि तखनि एक बेर फेर हमर पूर्वोत्तर अपन ताकत देखाबय जा रहल अछि।”

आगू ओ कहलनि, “हमरा मोन अछि, जखनि हम २०१३मे चुनाव अभियानक लेल असम जा रहल छलहुँ, एकटा बैसारमे अनायास हमर मोनसँ एकटा शब्द निकलल। हम कहलहुँ, ‘ओ दिन दूर नहि अछि जखनि लोक अल्फाबेट पढ़ाबय लगताह आ कहताह जे ‘ए से असम’ होएत।”

प्रधानमंत्री मोदी आगू कहलनि, “आइ हम सभ वैश्विक स्थितिकेँ बहुत बारीकीसँ देखि रहल छी आ बुझि रहल छी। वैश्विक अनिश्चितताक बीच सेहो दुनियाक विशेषज्ञ सभक बीच एकटा बात केर लऽ कऽ निश्चितता अछि आ ओ अछि भारतक तीव्र विकासक स्थिरता। भारतमे एहि विश्वासक एकटा बहुत प्रबल कारण अछि। आजुक भारत आबयवला २५ साल आ २१म शताब्दीक दीर्घकालिक दृष्टिकोणकेँ ध्यानमे राखि एकक बाद एक डेग बढ़ा रहल अछि।”

प्रधानमंत्री आगू कहलनि, “दुनियाक भरोसा आइ भारतक युवा आबादी पर अछि, जे बहुत तेजीसँ ट्रेंड कऽ रहल अछि आ नवोन्मेष (इनोवेशन) कऽ रहल अछि। दुनियाक भरोसा भारतक मध्यम वर्ग पर अछि, जे गरीबीसँ बाहर आबि नव ऊर्जाक संग आगू बढ़ि रहल अछि। दुनिया भारतक १.४ अरब लोकपर भरोसा करैत अछि जे राजनीतिक स्थिरता आ निरंतरताक समर्थन कऽ रहल अछि। दुनियाकेँ भारतक शासनमे विश्वास अछि, जे लगातार मजबूत भऽ रहल अछि।”

ओ कहलनि, “आइ भारत लोकल सप्लाई चेन (स्थानीय आपूर्ति श्रृंखला) केँ मजबूत कऽ रहल अछि। आइ भारत दुनियाक विभिन्न क्षेत्रक सङ्ग मुक्त व्यापार समझौता कऽ रहल अछि। पूर्वी एशियाक संग हमर संपर्क लगातार मजबूत भऽ रहल अछि।”

ओतहि राज्यक मुख्यमंत्री हिमंत बिस्वा सरमा कहलनि, “२०१३-१४ मे हमर सकल घरेलू उत्पाद २९ अरब डॉलर छल मुदा २०२३ मे हमर राज्यक सकल घरेलू उत्पाद ६८.७ अरब डॉलर भऽ गेल। एहि साल हमर सकल घरेलू उत्पाद वृद्धि 15.2% रहत। आइ एडवांटेज असम २.० समारोहमे हम भारतक उद्योगपतिसभकेँ आमंत्रित करय चाहब जे ओ आबि पीएम मोदीक पूर्वोत्तरक विकासक सपनामे भाग लेथि आ पूर्वोत्तरक विकासमे योगदान देथि।”

जनतब जे ई दु दिवसीय समिट निवेश बुनियादी ढांचा पर केंद्रित अछि जाहिमे ६० सँ अधिक देशक राजदूत एवं मिशन प्रमुख हिस्सा लऽ रहल छथि। ई आयोजन केन्द्र सरकारक ‘एक्ट ईस्ट पाॅलिसी’सँ जुड़ल अछि।