न्यूजीलैंडक प्रधानमन्त्री क्रिस्टोफर लक्सन १६-२० मार्च धरि अपन आधिकारिक भारत यात्राक तेसर दिन मंगलदिन नई दिल्लीक अक्षरधाम मन्दिर पहुंचला। लक्सन एक्स पर लिखलनि, “न्यूजीलैंडमे हिन्दू समुदायक हमर देशक लेल महत्वपूर्ण योगदान अछि। आइ दिल्लीमे हम बहुत रास कीवी- हिन्दू सभक लेल बीएपीएस स्वामीनारायण अक्षरधाम मन्दिरमे नमन कयलहुँ।
न्यूजीलैंडक प्रधानमंत्री क्रिस्टोफर लक्सन प्रधानमंत्री मोदीक सङ्ग राजधानीमे गुरुद्वारा रकाब गंज साहिबक सेहो दौरा कयलनि। सोमक साँझ न्यूजीलैंडक नेता हैदराबाद हाउसमे द्विपक्षीय चर्चाक बाद प्रधानमंत्री नरेन्द्र मोदीक सङ्ग राजधानीमे गुरुद्वारा रकाब गंज साहिबक दौरा कयलनि। लक्सन कहलनि, “प्रधानमंत्री नरेन्द्र मोदी आ हम गुरुद्वारा रकाबगंज साहिबक दौरा कयलहुँ, जे गहींर आस्था आ ऐतिहासक स्थान अछि। सेवा आ मानवताक प्रति सिख समुदायक अटूट प्रतिबद्धता सराहनीय अछि।
मंगलकेँ साँझ अपन दिल्ली यात्रा समाप्त करबाक लेल मुम्बई प्रस्थान करबासँ पहिने न्यूजीलैंडक प्रधानमन्त्री इंडिया गेट जयबाक लेल सेहो समय निकाललनि। सोमकेँ लक्सन आ कीवी प्रतिनिधिमण्डलक भारतमे स्वागत करैत प्रधानमंत्री मोदी न्यूजीलैंडक प्रधानमन्त्रीक भारतसँ गहींर संबंधक उल्लेख कयलनि।
प्रधानमंत्री मोदी कहलनि, “हम सभ देखलहुँ जे कोना किछु दिन पहिने ओ सभ ऑकलैंडमे होलीक पाबनि मनौलनि। न्यूजीलैंडमे रहनिहार भारतीय मूलक लोकक प्रति प्रधानमन्त्री लक्सनक स्नेह एहि तथ्यसँ सेहो देखल जा सकैत अछि जे हुनक सङ्ग एकटा पैघ सामुदायिक प्रतिनिधिमण्डल भारत आयल अछि।
दुनू नेता द्विपक्षीय सम्बन्धक विभिन्न क्षेत्र पर गहन चर्चा कयलनि आ रक्षा आ सुरक्षा सहयोगकेँ मजबूत आ संस्थागत करबाक निर्णय लेलनि। सोमदिन दुनू पक्षक बीच द्विपक्षीय चर्चाक बाद जारी भारत-न्यूजीलैंडक संयुक्त वक्तव्यमे कहल गेल, “प्रधानमन्त्री दुनू देशक जनताक बीच मजबूत सम्बन्धपर संतोष व्यक्त कयलनि।”
