केन्द्रीय पेट्रोलियम मंत्री हरदीप सिंह पुरी कहलनि जे भारतमे पेट्रोलियमक दाम दुनियामे सबसँ कम अछि।
आन्ध्र प्रदेशक विजयवाड़ामे एकटा संवाददाता सम्मेलनकेँ सम्बोधित करैत ओ कहलनि जे पछिला किछु सालमे देशमे ईंधनक दाम वास्तविक रूपसँ कम भेल अछि।
वैश्विक तेल आपूर्तिपर पुरी कहलनि जे आब अमेरिका, ब्राजील, गुयाना, सूरीनाम आ कनाडा सन देशसँ बेसी तेल आबि रहल अछि। केन्द्रीय मंत्री आगू कहलनि जे कच्चा तेलक कोनो कमी नहि अछि आ वर्तमानमे भारतकेँ ४० देशसँ आपूर्ति भेटि रहल अछि। पहिने ई संख्या 27 छल। जँ आओर देश शामिल होबय चाहैत अछि तऽ हम हुनकर स्वागत करब। एहिसँ तेलक दाम कम रखबामे सहायता भेटत।
ओ आगू कहलनि जे पेट्रोलक दाममे ०.६७ प्रतिशतक कमी दर्ज कयल गेल अछि। यद्यपि, डीजलक दाममे १.१५ प्रतिशतक वृद्धि देखल गेल अछि।
पुरी स्पष्ट कयलनि जे पेट्रोलियम मूल्यमे गिरावटसँ सरकारकेँ कोनो वित्तीय लाभ नहि भेटल अछि। एकर बदला सरकार तेल कम्पनीसभकेँ २२,००० करोड़ टाकाक राहत देलक अछि।
प्रधानमंत्री नरेन्द्र मोदीक कार्यकालमे भेल आर्थिक प्रगतिपर प्रकाश दैत पुरी कहलनि जे २०१४ मे भारत १०म सबसँ पैघ अर्थव्यवस्था छल आ पाँचटा सबसँ कमजोर अर्थव्यवस्थामे सेहो शामिल छल। ओहि समयमे देश विकासक लेल विदेशी निवेश पर बहुत बेसी निर्भर छल।
पुरी आगू कहलनि जे पीएम मोदीक कार्यकालमे भारतीय अर्थव्यवस्थामे उल्लेखनीय सुधार भेल अछि आ देश दुनियाक चारिम सबसँ पैघ अर्थव्यवस्था बनि गेल अछि। भारत जल्दिये ४ ट्रिलियन डॉलरक अर्थव्यवस्था बनि जायत।
फिच रेटिंग्सक एकटा रिपोर्टमे उल्लेख कयल गेल अछि जे चालू वित्तीय वर्षमे भारतमे पेट्रोलियम उत्पादक माँगमे तीनसँ चारि प्रतिशतक वृद्धि भऽ सकैत अछि। रिपोर्टमे संकेत देल गेल अछि जे आपूर्तिमे वृद्धि आ कच्चा तेलमे उतार-चढ़ावसँ कम लाभक कारणेँ भारतीय तेल विपणन कम्पनीसभक रिफाइनरी मार्जिनमे वित्त वर्ष २५मे गिरावट आबि सकैत अछि।
