दिल्ली सरकार राजधानीमे बढ़ैत प्रदूषणकेँ नियंत्रित करबाक लेल एकटा महत्वपूर्ण निर्णय लेलक अछि। पर्यावरण मंत्री मनजिंदर सिंह सिरसा शनिदिन कहलनि जे ३१ मार्चक बाद १५ सालसँ पुरान वाहनसभकेँ पेट्रोल-डीजल नहि भेटत। एहेन वाहनक पहिचान करबाक लेल एकटा विशेष टीमक गठन कयल जायत।
एकर अतिरिक्त, प्रदूषणकेँ नियंत्रित करबाक लेल प्रमुख होटल, किछु पैघ कार्यालय परिसर, दिल्ली हवाई अड्डा, आ दिल्लीमे पैघ निर्माण स्थलसभकेँ प्रदूषणक प्रबन्धनक लेल तत्काल एंटी-स्माॅग गन लगायब अनिवार्य करय जा रहल अछि।
सिरसा कहलनि, हम आइ निर्णय लेलहुँ अछि जे हम क्लाउड सीडिंग लेल जे कोनो आवश्यक अनुमति चाही से हम लेब, आ हम ई सुनिश्चित करब जे जखनि दिल्लीमे गंभीर प्रदूषण होयत तखनि प्रदूषणकेँ नियंत्रित करबाक लेल क्लाउड सीडिंगक माध्यमसँ बरखा कराओल जा सकय।
दिल्लीमे प्रदूषणकेँ नियंत्रित करबाक लेल सिरसा अधिकारीसभ संग बैसार कयलनि आ एहि बैसारमे कतेको पैघ निर्णय लेल गेल। सरकार दिल्लीमे खाली जगह पर पेड़-पौधा लगाओत।
