सीएम नितीश कुमार कहलनि जे, ई बहुत खुशीक बात अछि जे 1100 रुपया केर राशि सब बुजुर्ग, दिव्यांग आ विधवा महिलाक बैंक खातामे भेजल गेल अछि। ई सभ महीनाक 10 तारीखकेँ भेजल जाइत अछि।
मुख्यमंत्री नीतीश कुमार रविदिन 1 ऐने मार्ग स्थित ‘संकल्प’ भवनमे एक करोड़ 12 लाखसँ बेसी पेंशनभोगीक खातामे 1247.34 करोड़ टकाक राशि ट्रांसफर कय देलथि। जुलाई मासक 1100 रुपयाक पेंशन राशि सामाजिक सुरक्षा पेंशन योजनाक लाभार्थीक खातामे जमा कय देल गेल अछि।
कार्यक्रममे समाज कल्याण विभागक सचिव वंदना प्रेयसी सामाजिक सुरक्षा पेंशन योजनाक तहत जुलाई महीनामे देल जाय वला पेंशनक राशि आ लाभार्थीक संख्याक बारेमे जनतब दैत कहलनि जे, समाज कल्याण विभाग मुख्यमंत्रीक निर्देशक अनुसार सब पात्र सामाजिक सुरक्षा पेंशनभोगीकेँ अपन लाभ देबय लेल पूर्ण रूपसँ प्रतिबद्ध अछि। पेंशनकेँ बेसी सुलभ बनेबा लेल समाज कल्याण विभाग टोल फ्री नंबर 18003456262 जारी कयलक अछि। ओ कहला जे पेंशनसँ संबंधित कोनो तरहक जनतब सोमदिनसँ शनिदिन धरि लेल जा सकैत अछि आ शिकायत दर्ज कराओल जा सकैत अछि।
कार्यक्रमकेँ संबोधित करैत मुख्यमंत्री कहलनि जे सामाजिक सुरक्षा पेंशनक तहत जुलाई मासक पेंशन राशि 1100 रूपयाक दरसँ आइ सबटा बुजुर्ग, दिव्यांग आ विधवा महिलाक बैंक खातामे पठा देल गेल अछि, इ बहुत खुशीक गप अछि। हम पहिने निर्देश दऽ चुकल छी जे सभ महीनाक 10 तारीखकेँ पेंशनक राशि सब लाभार्थीकेँ खातामे भेजल जाय। लाभार्थीकेँ खातामे पेंशनक राशिकेँ समय पर पहुंचलासँ हुनका लेल सुविधाजनक होएत।
विशेष ध्यान राखब जे कोनो पात्र सामाजिक पेंशनभोगी बाहर नहि रहय, जे किछु सामाजिक पेंशनभोगी छुटि जाइथ, हुनका सेहो जल्दी एकर लाभ भेटबाक चाही। मुख्यमंत्री कहलनि जे, जून माससँ राज्य सरकार सामाजिक सुरक्षा पेंशनक तहत बुजुर्ग, दिव्यांग आ विधवा महिलाकेँ सभ महीना भेटय वला पेंशनक राशि 400 रुपयासँ बढ़ाकेँ 1100 रुपया प्रति माह कय देलक अछि। एहि निर्णयक आलोकमे 11 जुलाई 2025 केँ जून मासक राशि सेहो सीधा कुल 1 करोड़ 11 लाख लाभार्थीक बैंक खातामे हमरा माध्यमसँ 11 सौ टका प्रति लाभार्थीक दरसँ पठा देल गेल, एहि काजमे राज्य सरकार द्वारा कुल 1 हजार 2 सौ 27 करोड़ टका खर्च कयल गेल।
जनतब देब जे राज्यमे 06 सामाजिक सुरक्षा पेंशन योजना लागू भऽ रहल अछि, जाहिमे सँ 03 केंद्र सरकार केर माध्यमसँ आ 03 पेंशन योजना राज्य सरकारक माध्यमसँ चलाओल जा रहल अछि। राष्ट्रीय सामाजिक सहायता कार्यक्रम केर तहत राष्ट्रीय पेंशन योजना इंदिरा गांधी राष्ट्रीय वृद्धा पेंशन योजना, इंदिरा गांधी राष्ट्रीय विधवा पेंशन योजना आ इंदिरा गांधी राष्ट्रीय विकलांग पेंशन योजना अछि, जखनि कि राज्य पेंशन योजनामे लक्ष्मीबाई सामाजिक सुरक्षा पेंशन योजना, बिहार विकलांग पेंशन योजना आ मुख्यमंत्री वृद्धा पेंशन योजना शामिल अछि।
