बिहारमे अपराधीक दुस्साहस बढ़ि रहल अछि। शुक्र दिन पूर्णियाक तनिष्क ज्वेलरीक शोरूममे डकैतीक घटनाक खुलासा तक नहिं भेल छल, आब राजधानी पटनामे बाइक सवार बदमाश दूटा गाममे गोली चला दहशत पसारि देलक। बाइक सवार उपद्रवी सभक गोलीबारीमे एकटा गामक लोकक मृत्यु भऽ गेल अछि। ओइठाम दू गोटे घायल भए गेल छथि। पुलिस मामिला दर्ज कऽ लेलक अछि आ आरोपीक तलाश जारी अछि।
पटनाक रामकृष्ण नगर क्षेत्रमे भेल एहि घटनामे एक व्यक्तिक मृत्यु भऽ गेल आ दू गोटे घायल भऽ गेलाह। पुलिस इलाकामे आरोपीकेँ खोजि रहल अछि।
रामकृष्ण नगर थानाक पिपरा गाममे शुक्रदिन साँझ बाइक सवार अपराधी दूटा लोककें गोली मारि देलक। जाहिमे दूनू गोटे घायल भए गेलाह। गोलीबारीक घटना क्षेत्रमे सनसनी पैदा कऽ देलक। एकर बाद अपराधी सभ ओतयसँ भागि पिपरा गाम लग एकटा आओर गाम शेखपुरा पहुँचि गेल। ओतय ओ राजेश कुमार नामक व्यक्तिकेँ गोली मारि देलक। एहि घटनामे इलाजक क्रममे राजेशक मृत्यु भऽ गेल। पिपरा गाममे गोली मारल गेल दुनूक इलाज चलि रहल अछि।
घटनाक सूचना भेटलाक बाद पुलिस आगू जाँच शुरू कऽ देलक अछि। घटनाक जानकारी दैत पटना पूर्वक एसपी इंडिया सोनी कहलखिन कि पुलिसकेँ बीतल राति करीब १० बजे सूचना भेटल जे रामकृष्ण नगर थाना क्षेत्रमे पिपरा गांव लग किछु बाइक सवार अपराधी दू गोटेकेँ गोली मारि देलक। पुनः ओ अपराधी शेखपुरा गाममे एकटा व्यक्तिकेँ सेहो गोली मारि देलक, जकर इलाजक क्रममे मृत्यु भऽ गेल।
