घटना पटनामे 18 घंटाक भीतर 3 हत्या, ऑनलाइन एग्जाम सेंटर संचालकक हत्या March 12, 2025 Maithil Punarjagran Prakash पटना समदिया * बिहारक राजधानी पटनामे १८ घंटामे तीनटा हत्याक घटनाक कारण सनसनी पसरि गेल अछि। एसपी एकटा क्राइम मीटिंग कऽ रहल छलाह जखनि अपराधी एकटा ऑनलाइन परीक्षा केन्द्रक संचालकक हत्या कऽ देलक। राजधानी पटनामे पछिला १८ घंटामे भेल घटनासँ लोक भयभीत भऽ गेल अछि। सोमकेँ भोरे, बुद्ध कॉलोनी थाना क्षेत्रमे भारत स्काउट एवं गाइड कार्यालयमे एकटा विद्युत ठेकेदारक हत्याक मामिला एखन ठंडा नहि भेल छल आ रातिमे अपराधी राजीव नगर क्षेत्रक ऑनलाइन परीक्षा केन्द्रक संचालककेँ गोली मारि देलक। ओतहि फुलवारीमे एकटा युवकक गोली मारबाक आ ओकर हत्याक मामिला सामने आयल अछि। सोमकेँ राति जखनि पटनाक एसएसपी अवकाश कुमारक नेतृत्वमे क्राइम मीटिंग चलि रहल छल, तखनि अपराधी राजीव नगर थाना क्षेत्रक अम्बेडकर पथ पर नन्दन पुरी कॉलोनी स्थित ऑनलाइन कोचिंग परीक्षा केन्द्रक संचालक सुदेश कुमार उर्फ चुनचुन कुमारकेँ गोली मारि हत्या कऽ देलक। सुदेश अपन परीक्षा केन्द्रसँ घर घुरि रहल छलाह आ घरक लग पहुँचल छलाह तखनि बाइक सवार अपराधी सभ हुनका पर गोली चला देलक। हुनका गम्भीर स्थितिमे पटनाक एकटा अस्पतालमे भर्ती कयल गेल। मुदा, मंगलकेँ भोरमे हुनक मृत्यु भऽ गेलनि। घटनाक बादसँ परिवारमे शोक पसरल अछि। जनतब जे समाचार सम्प्रेषण तक पुलिस एहि मामिलामे कोनो गिरफ्तारी नहि कऽ सकल छल। Spread the love
