बिहारक पटना जिलाक दीघा थाना क्षेत्रमे पुलिस आ स्पेशल टास्क फोर्स (एसटीएफ) द्वारा संयुक्त छापामारीमे एकटा वांछित अपराधी ओम कुमार उर्फ यथार्थ कुमारक संग ओकर सहयोगीकेँ बंदी बनेलक अछि। पुलिस ओकरासँ कतेको आओर अवैध हथियार सेहो जब्त कयलक, जाहिमे एकटा पेन पिस्तौल सेहो शामिल अछि। पुलिसक दावा अछि जे अपराधी एकटा व्यक्तिक हत्याक योजना बना रहल छल।
पुलिसक अनुसार एसटीएफकेँ तकनीकी जानकारी भेटल जे दीघा थाना क्षेत्रमे किछु अपराधी जमा भेल अछि आ मोंटी सरकार नामक व्यक्तिक हत्या करबाक योजना बना रहल अछि।
उपरोक्त जनतबक आधार पर पुलिस आ एसटीएफ तत्काल कार्यवाही कयलक आ योजनामे शामिल अपराधीकेँ गिरफ्तार कय हत्याक प्रयास नाकाम कय देलक।
एकटा अधिकारी कहलनि जे, काल्हि बृहस्पतिकेँ बिहार एसटीएफ आ पटना जिला पुलिसक विशेष टीमक संयुक्त अभियानमे दीघा थाना क्षेत्रमे छापामारीक बाद पटना जिलाक अपराधी ओम कुमार उर्फ यथार्थ कुमार आ अंकित कुमारकेँ अवैध हथियारक संग गिरफ्तार कयल गेल।
गिरफ्तार अपराधी द्वारा देल गेल जनतबक बाद पटनाक नौबतपुरक बरही कोपा गामक निवासी पप्पू कुमारक घर पर छापा मारल गेल, जतयसँ पुलिस कतेको अवैध हथियार बरामद कयलक। पुलिसक कहब अछि जे बरामद हथियारमे तीनटा पिस्तौल, एकटा पेन पिस्तौल, छह मैगजीन, 131 राउंड 7.65 मिमी कारतूस, चारि राउंड पेन पिस्तौल कारतूस, दू राउंड .32 बोर कारतूस, एक राउंड 303 बोर कारतूसक अलावा चाकू आ खंजर शामिल अछि।
जनतब जे पिछला मास जूनमे अपराधी ओम कुमार उर्फ यथार्थ कुमार द्वारा अटल पथ पर हवामे गोली चला कय लोकमे आतंक पसारबाक एकटा वीडियो वायरल भेल छल। एहि संबंधमे पटलीपुत्र थाना केस नंबर 227/25 दर्ज अछि। पुलिस गिरफ्तार अपराधी सभसँ पूछताछ कऽ आर जनतब जुटा रहल अछि।
