बिहारक राजधानी पटनामे वायु गुणवत्ता सूचकांक (एक्यूआई) ३१६ दर्ज कयल गेल, जाहिसँ ई भारतक दोसर सबसँ प्रदूषित शहर बनि गेल।
*
पटना
*
बिहारक राजधानी पटना रविदिन वायु गुणवत्ता सूचकांक (एक्यूआई) ३१६ दर्ज कयलक, जाहिसँ ई भारतक दोसर सबसँ प्रदूषित शहर बनि गेल। एक्यूआई ३१६ ‘बहुत खराब’ श्रेणीमे अबैत अछि। राज्यक एहि अन्य चारि शहरमे ‘खराब’ एक्यूआई दर्ज कयल गेल – सिवान (२८२), मुजफ्फरपुर (२३३), हाजीपुर (२३२) आ बेतिया (२२१)।
ग्रेटर नोएडा देशक सबसँ प्रदूषित शहर
साँझ ४ बजे केन्द्रीय प्रदूषण नियंत्रण बोर्ड (सीपीसीबी)क बुलेटिनक अनुसार, उत्तर प्रदेशक ग्रेटर नोएडा देशक सबसँ प्रदूषित शहर छल जकर एक्यूआई ३४६ छल। सीपीसीबीक अनुसार, “बहुत खराब” वायु गुणवत्ताक दीर्घ समय धरि संपर्कमे रहलासँ श्वसन रोग भऽ सकैत अछि।
बिहार राज्य प्रदूषण नियंत्रण बोर्ड (बीएसपीसीबी) केर अध्यक्ष देवेन्द्र कुमार शुक्ला कहलनि, “ई सच अछि जे राज्यक किछु शहरमे हवाक कम गति, प्रदूषण नियंत्रण उपायक पालन कयने बिना चलि रहल निर्माण गतिविधि आ हालमे पटना आ आसपासक क्षेत्रमे आगि लगबाक घटनाक कारण वायु गुणवत्ता खराब भऽ गेल अछि। ओ कहलनि जे राज्यक राजधानीमे वायुक बिगड़ैत गुणवत्ताकेँ रोकबाक लेल नगर निकायसभकेँ पानिक छिड़काव शुरू करय पड़त।
राजधानी दिल्लीक बात करब तँ एतय प्रदूषणक स्तरमे कनेक वृद्धि भेल अछि। एतय वायु गुणवत्ता सूचकांक ३०० केर करीब पहुँचि गेल अछि। दोसर दिस, फरीदाबादमे प्रदूषणक स्तरमे २४ अंकक कमी दर्ज कयल गेल अछि, जकर बाद वायु गुणवत्ता सूचकांक घटि कऽ २४८ पर आबि गेल अछि।
