बिहार शिक्षक भर्ती परीक्षासँ जुड़ल पैघ समाचार अछि, जतय पटना उच्च न्यायालय बीपीएससी बिहार शिक्षक भर्ती परीक्षा टीआरई ३ पर फिलहाल रोक लगा देलक अछि। जनतब जे बीपीएससी टीआरई ३ मे कुल ८७७२२ पदक बहाली निकालने छल। पहिल बेर प्रश्न पत्र लीक भेलाक कारण मार्चमे परीक्षा रद्द कऽ देल गेल छल। ओतहि फेर परीक्षासँ पहिने पटना उच्च न्यायालय रोक लगा देलक अछि।
संगहि पटना उच्च न्यायालय प्लस २ स्कूलक अतिथि शिक्षक केर वेटेज देबाक मामिला पर सेहो रोक लगा देलक अछि। न्यायालय प्रत्येक वर्षक आधार पर ५ अंकक वेटेज आ ५ सालक आधार पर अधिकतम २५ अंकक वेटेज देबाक आदेश देलक अछि। न्यायालय कहलक जे पिछड़ा आ अति पिछड़ा विभागक शिक्षककेँ महत्व भेटि रहल अछि। बीपीएससी शिक्षक भर्तीमे हुनका सभ सालक आधार पर ५ अंकक वेटेज भेटि रहल अछि।
न्यायालय कहलक जे दुनू शिक्षक छथि आ दुनू शिक्षकक रूपमे पढ़ेबाक काज करैत छथि। शिक्षा विभागसँ अतिथि शिक्षककेँ सेहो वेटेज भेटबाक चाही। एहि संबंधमे अतिथि शिक्षक पटना उच्च न्यायालयमे याचिका दायर कयने छलाह, जकर बाद न्यायालय शिक्षा विभागकेँ अतिथि शिक्षक केर वेटेज देबाक आदेश देलक अछि। जनतब जे टीआरई-३ मे कुल ५.२५ लाख अभ्यर्थी फॉर्म भरने छथि। बीपीएससी २० जूनसँ परीक्षा आयोजित करबा पर विचार कऽ रहल छल।
शिक्षक भर्ती टीआरई ३ केर पेपर लीक भेल छल
बीपीएससी द्वारा तेसर चरणक शिक्षक नियुक्तिक परीक्षा १५ मार्चकेँ दुनू पालीमे आयोजित कयल गेल छल। एकर पेपर लीक भए गेल छल। पता चलल जे हजारीबागक एकटा होटलमे कतेको कमराक अतिरिक्त एकटा विवाह कक्षमे २७० सँ बेसी अभ्यर्थी सभसँ बैसा कय प्रश्नपत्रक उत्तर देल जा रहल छल। घटनास्थलसँ जब्त कयल गेल प्रश्नपत्रक मिलान बीपीएससी कार्यालयसँ प्राप्त प्रश्नपत्रसँ कयल गेल, जे सटीक पाओल गेल।
