पटनामे राजद प्रमुख लालू यादव अपन बड़का बेटा तेज प्रताप यादवक संग राष्ट्रीय लोक जनशक्ति पार्टीक प्रमुख पशुपति कुमार पारसक घर पहुंचि तिला संक्रांतिक अवसर पर आयोजित भोजमे भाग लेलनि। एहि अवसर पर पशुपति कुमार पारस कहलनि जे मकर संक्रांति पर हम राजग, राजद, कम्युनिस्ट, कांग्रेस, आ सभ दलक लोककेँ आमंत्रित कयलहुँ आ भोज लेल अयबाक अनुरोध कयलहुँ। सभ दलक लोक अयलाह।
पशुपति पारस कहलनि जे ओ मुख्यमंत्री नीतीश कुमारकेँ सेहो आमंत्रित कयने छलाह, मुदा ओ नहि अयलाह। ई पूछला पर कि की ओ महागठबंधनमे शामिल हेताह, पारस कहलनि जे लालू प्रसाद यादवसँ हुनकर पुरान पारिवारिक संबंध अछि। जतय हम भेंटैत छी, हम हुनकर सम्मानपूर्वक स्वागत करैत छी। ओ हमर आदरणीय नेता छथि, पैघ भाई छथि।एखनि एहि बारेमे किछु कहब जल्दबाजी होयत। ई पूछला पर जे की आब राजगक दरवाजा बंद भऽ गेल अछि, पारस कहलनि जे चुनावमे एखनो १० मास बचल अछि, आ एखनि किछु नहि कहल जा सकैत अछि।
जखनि पूछल गेल जे चिरागकेँ किएक आमन्त्रित नहि कयल गेल, तँ ओ कहलनि जे चिराग पासवानक काल्हि एकटा कार्यक्रम छल। हमरासभकेँ चिरागसँ कोनो आमंत्रण नहि भेटल, तेँ हम हुनका आमंत्रित नहि कयलहुँ। महागठबंधनमे शामिल होयबाक संबंधमे ओ कहलनि जे व्यक्ति बलवान नहि होइत अछि समय बलवान होइत अछि। समयक प्रतीक्षा करू।
जखनि लालू यादवसँ पूछल गेल जे की पसुपति पारसकेँ महागठबंधनमे लेब तऽ राजद प्रमुख बस ‘हँ’ कहि आगू बढ़ि गेलाह। लालू यादवक बयानक बाद चिराग पासवानक काका पसुपति पारस महागठबंधनमे शामिल होयताह वा नहि, एहि बातक अटकलबाजी शुरू भऽ गेल अछि।
उल्लेखनीय अछि जे एहि साल बिहारमे विधानसभा चुनाव होबय वाला अछि। चिराग पासवान आ पारसक संबंध नीक नहि अछि। काका आ भतीजा दुनू एखनो एनडीएक संग छथि। पारसकेँ लोकसभा चुनावमे कोनो सीट नहि भेटल छल।
