संसदक सुरक्षामे पैघ गलती, दर्शक दीर्घासँ कूदल दू गोटे
अध्यक्ष बिड़ला कहलनि – दू गोटे पकड़ल गेल, हर स्तर पर जाँच जारी
*
नई दिल्ली
*
लोकसभा अध्यक्ष ओम बिड़ला बुधदिन सदनकेँ सदनक सुरक्षामे भेल चूकक जानकारी दैत कहलनि जे दुनू लोक (सदनमे कूदल युवा) केँ पकड़ि लेल गेल अछि आ हुनका लग मौजूद सामग्री सेहो जब्त कऽ लेल गेल अछि।
बिरला इहो कहलनि जे संसद भवनक बाहरसँ दूटा लोककेँ गिरफ्तार सेहो कयल गेल अछि। दुपहरिया २ बजे सदन फेरसँ शुरू भेला पर सदनकेँ जानकारी दैत लोकसभा अध्यक्ष बिड़ला कहलनि जे लोकसभा शून्यकालमे भेल घटनाक गहन जाँच कऽ रहल अछि आ एहि सम्बन्धमे दिल्ली पुलिसकेँ आवश्यक निर्देश सेहो देल गेल छैक। मुदा हमर सभक जे चिंता छल कि ओ धुआं की छल ? तऽ एखन धरि प्रारंभिक जाञ्चमे ई पता चलल अछि जे धुआँ साधारण छल, बस सनसनी फैलायब ओकर ध्येय छलैक तेँ ई धुआँ चिन्ताक विषय नहि अछि, एकर प्रारम्भिक जाँच कयल गेल अछि।
सदनमे विपक्षी सांसदक चर्चाक माँगपर बिड़ला कहलनि एहि घटनाक प्रारम्भिक जाँच एखनहु चलि रहल अछि आ अन्तिम जाञ्चमे तथ्य सामने अयलाक बाद ओ सदनकेँ तथ्यसँ अवगत कराओत।
- वास्तवमे बुधदिन लोकसभामे शून्यकालक कार्यवाहीक दौरान सदनमे अचानक तखनि अफरा-तफरीक माहौल बनि गेल जखन अचानक 2 युवक दर्शक दीर्घासँ सदनमे कूदि गेल आ एहिमेसँ एक युवक सीट पर कूदि कऽ आगू बढ़य लागल। जखन सदनमे उपस्थित सांसद दुनूकेँ पकड़बाक प्रयास कयलनि तँ ओ जूतासँ किछु हटयबाक प्रयास कयलक।
कतेको सांसद इहो कहलनि जे ओहि समय सदनक भीतर पीयर धुआँ सेहो देखल गेल छल। सांसद सभ दुनूकेँ पकड़ि सुरक्षाकर्मीकेँ सौंपि देलनि। कार्यवाही कऽ रहल सभापति राजेन्द्र अग्रवाल तत्काल लोकसभाक कार्यवाही रोकि देलनि आ सदनक कार्यवाही २ बजे धरि स्थगित कऽ देलनि।
ई पैघ सुरक्षा उल्लंघन ओहि दिन भेल जखन देश भारतक लोकतंत्रक सर्वोच्च मन्दिर १३ दिसम्बर २००१ केँ संसद भवन पर भेल भयावह हमलामे मारल गेल सुरक्षाकर्मीकेँ स्मरण कय रहल अछि।
