72 घंटासँ बेसी पहिने भारत सरकार आ बिहार सरकारकेँ जानकारी भेटल छल जे कोसी नदीमे 6 लाख 63 हजार क्यूसेक पानि छोड़ल जाएत। तइयो सरकार द्वारा ई जानकारी आम जनताकेँ नहि देल गेल। जकर वजहसँ कोसी तटबंधक भीतर रहय वाला लाखों लोक पर एकर प्रतिकूल असर पड़ल। लाखों घर डूबि गेल। मवेशी सेहो बाढ़िक शिकार भऽ गेल। करोड़ोंक फसल नुकसान भेल। लोकक जान तबाह भऽ गेल। बहुतो निर्दोष लोकक जान सेहो चलि गेल मुदा सरकारक तरफसँ कोनो व्यवस्था नहिं भेल बल्कि लोक केर भगवान.भरोसे छोड़ि देल गेल। ई बात पूर्णिया सांसद पप्पू यादव वृहस्पति दिन परिसदनमे आयोजित प्रेस कॉन्फ्रेंसमे कहलनि।
ओ पुछलनि जे भारत सरकार नेपालसँ किएक डरैत अछि। सरकार द्वारा हाइडम बनेबाक कोनो बात नहिं अछि। कोनो समझौता नहिं भऽ रहल अछि। नै तऽ कोनो नव बैराजक गंभीरतासँ सोचल जा रहल अछि। नदीक भीतर जमा गादि केर हटाबय केर कोनो काज नहि भऽ रहल अछि।
ओ कहलनि जे, विश्व बैंकक माध्यमसं बांधक मरम्मत तक नहि भऽ रहल अछि। लूटय केर काज राजनेताक सहमति आ ठेकेदारक माध्यमसँ भऽ रहल अछि।
पप्पू यादव कहलनि जे, कोसी तटबंधक भीतर जिला प्रशासनक शीघ्रताक बावजूद कोसी बांध केर बचाओल नहिं जा सकल। जमालपुर आ किरातपुर गामक नदीक पश्चिमी तटबंध टूटि गेल। एकरा कारण लोक केर बहुत परेशानी केर सामना करय पड़ल अछि, ओ कहलनि जे हम पहिल व्यक्ति छलहुं जे बाढ़ि पीड़ित लग पहुंचलहुं आ हुनकर नोर पोछलहुं। एकर अलावा भूख-प्याससँ पीड़ित लोककेँ बोतलबंद पानि, राशन आर नगदी सेहो उपलब्ध कराय देल गेल। एकर अलावा लोकक भोजनक लेल सामुदायिक भनसाघर सेहो शुरू कएल गेल अछि।
सांसद पप्पू यादव कहलनि जे, 2008 मे कुसहा त्रासदीक समय एकरा राष्ट्रीय शोक मानल गेेल। संगहि बाढ़ि पीड़ित केर मदद लेल करोड़ों रुपया सेहो एहि इलाकाक विकासक लेल आयल छल, मुदा आई धरि ओहि इलाका केर स्थिति ओहिना अछि। एखनो खेतमे बालु पसरल अछि। जकर कारण किसान निराश छथि। सांसद यादव पूरा कोसी क्षेत्रकेँ बाढ़ि प्रभावित घोषित करबाक मांग केलनि। ओ अन्न अनाज आ अन्य राहतक अलावा सब पीड़ितक खातामे दू-दू लाख रुपया देबय केर मांग सेहो कयलनि।
ओ कहलनि जे, आइ हरियाणामे चुनाव भऽ रहल अछि जकर कारण ओतय हेलीकॉप्टर केर भरमार अछि मुदा बाढ़ि पीड़ितक लेल कोनो हेलीकॉप्टरक सुविधा नहिं देल गेल अछि, बाढ़ि पीड़ित पानिमे डूबि रहल अछि मुदा ओ नेता सब चिंतित नहिं छथि। ओहि लोकक लेल बाढ़ि पिकनिक स्थल जेकाँ लगैत अछि जकर कारण बाढ़ि पीड़ितक नोर पोछयमे विपक्षी दल सहित कोनो राजनेता वा जनप्रतिनिधि सहयोग नहिं कऽ रहल अछि।
एहि अवसर पर जिला अध्यक्ष रंजन यादव, शशिभूषण यादव, कमलेश्वरी यादव, कपिल देव यादव, दीपक मिश्र, मनीष यादव, युवा नेता राहुल भगत, रामकुमार, अरुण, महेश कुमार, सुमन, अरविंद यादव, सबीन, नरेश कुमार, समीर पाठक आदि उपस्थित रहलाह|
