राजद प्रमुख लालू प्रसाद यादवक छोट बेटा तेजस्वी यादव पूर्णियामे एकटा चुनावी जनसभाकेँ सम्बोधित करैत इंडिया एलायन्सक उम्मीदवार बीमा भारतीक समर्थनमे प्रचार कयलनि। एहि दौरान ओ एतय तक कहि देलनि जे जँ इंडिया गठबंधनकेँ समर्थन नहिं करय चाहैत अछि तऽ कोनो बात नहिं, एनडीएकेँ करू।
आब हुनकर बयान पर राजनीतिक हंगामा शुरू भऽ गेल अछि। वास्तवमे राजनीतिक गलियारामे चर्चा अछि जे आब तेजस्वी यादव पप्पू यादवकेँ हराबय केर उद्देश्यसँ ई बयान देने छलाह, जाहि पर पप्पू यादव आब पलटवार कयलनि अछि। ओ तेजस्वी यादवकेँ बिच्छू कहलनि आ सलाह देलनि जे हुनका अपन पिता लालू प्रसादसँ सीख लेबाक चाही। आगू ओ कहलनि जे तेजस्वी राजा छथि, हम रँक छी आ राजाक विषयमे रन्कक मुँहसँ किछु कहब उचित नहिं होयत।
पप्पू यादव कहलनि जे राहुल गाँधीक लक्ष्य देश अछि। लेकिन, तेजस्वीक लक्ष्य कुर्सी अछि। हुनका संविधान बचाबयसँ कोनो मतलब नहिं, ओ तऽ भाजपाक प्रचार कऽ रहल छथि।
एहिसँ पहिने पप्पू यादव अपन राजनीतिक दल जन अधिकार पार्टीक कांग्रेसमे विलय कऽ देने छलाह, मुदा इंडिया गठबंधनक तरफसँ पूर्णियासँ टिकट हुनका नहिं, बल्कि बीमा भारतीकेँ देल गेल, जाहिसँ हुनक आशा धराशायी भऽ गेल। एकर बाद ओ पूर्णियासँ निर्दलीय चुनाव लड़बाक घोषणा कयलनि।
