पूर्णियाक सांसद पप्पू यादवकेँ लगातार धमकी देबाक मामिलामे बिहार पुलिस बड़का खुलासा कयलक अछि। जांचक दौरान पुलिस एकटा आरोपी युवककेँ गिरफ्तार कयलक अछि। पुलिसक पूछताछमे आरोपी युवक कहलक जे ओ पाइ केर लालचमे धमकी देबाक ड्रामा कयलनि।
पुलिस भोजपुर जिलासँ एकटा आरोपी युवककेँ गिरफ्तार कयलक। गिरफ्तार आरोपी पुलिसक सामने कतेको खुलासा कयलक अछि। आरोपी युवक कहलक जे पप्पू यादवकेँ सुरक्षा प्रदान करबाक लेल हुनक अपने समर्थक हुनका पैसाक लालच दऽ कऽ धमकी दियेलनि। आरोपी कहलक जे वीडियो शूट पाइ दऽ कऽ बनाओल गेल छल। ओ कहलक, पप्पू यादवक समर्थक हमरा पाइ दऽ कऽ ई करय लेल कहलनि। जकर बाद हम वीडियो शूट कयलहुँ। आरोपी कहलक जे ओकरा वीडियो शूट करबाक लेल लाखो रुपयाक प्रस्ताव भेटल छल। ई एहि लेल कएल जा रहल छल जाहिसँ पप्पू यादवक सुरक्षा बढ़ाओल जा सकय।
पूर्णियाक एसपी कार्तिकेय शर्मा कहलनि जे आरोपी रामबाबू राय पूर्वमे जाप पार्टीक सदस्य रहि चुकल अछि। सांसद पप्पू यादव ओकर गाम सेहो गेल छलाह आ सांसदक संग आरोपीक फोटो सेहो अछि। एसपी कहलनि जे युवककेँ वीडियो शूट करय लेल २ लाख रुपयाक ऑफर देल गेल छल आ २००० रुपया एडवांस देल गेल छल। पुलिस युवक लगसँ २ टा वीडियो बरामद कयलक अछि। पुलिसक अनुसार, ई वीडियो एक मास पहिने शूट कयल गेल छल आ उचित समय पर एकर उपयोग कयल जयबाक छल।
पूर्णिया पुलिस द्वारा एहि खुलासाक बाद आब धमकीक मामिलामे पूरा कहानी उलटि देल गेल अछि। पूर्णिया पुलिसकेँ लॉरेंस बिश्नोई गिरोहसँ कोनो लिंक नहिं भेटल अछि। तइयो पूर्णिया पुलिस प्रत्येक धमकीकेँ गम्भीरतासँ लऽ रहल अछि आ एकर जाँच सेहो कऽ रहल अछि। पूर्णिया पुलिसक एहि खुलासाक बाद पप्पू यादवक एखनि धरि कोनो प्रतिक्रिया नहिं आयल अछि।
