देशक राजधानी दिल्लीमे पानिक कमीकेँ लऽ कऽ राजनीति तेज भऽ गेल अछि। एम्हर दिल्लीक जल मंत्री आतिशी आरोप लगओलनि अछि जे राष्ट्रीय राजधानीमे पाइपलाइन काटबाक षड्यंत्र चलि रहल अछि।
आतिशी दिल्ली पुलिस आयुक्तकेँ एकटा पत्र लिखने छथि जाहिमे ओ मुख्य जल पाइपलाइनकेँ सुरक्षा प्रदान करबाक अनुरोध कयलनि अछि।
पत्रमे ओ कहलनि अछि जे दिल्ली भीषण गर्मी आ पानिक संकटसँ जूझि रहल अछि। यमुनामे पानिक कमीक कारण प्रतिदिन लगभग ७ करोड़ गैलन जल उत्पादनमे गिरावट आयल अछि। राष्ट्रीय राजधानीक कतेको भागमे पानिक कमीक सामना करय पड़ि रहल अछि। एहन स्थितिमे पानिक एक-एक बूंद अनमोल भऽ जाइत अछि।
आतिशी कहलनि जे दिल्ली जल बोर्डक गश्ती दलकेँ शनिदिन दक्षिण दिल्ली राइजिंग मेन पाइपलाइनमे गढ़ी मेंडू ट्रांसफार्मरक लग एकटा पैघ रिसाव भेटल। जाँच पर पता चलल जे ३७५ मिमीक ५ बोल्ट आ १२ इंचक एकटा बोल्ट कियो काटि लेलक। एहनमे लगैत अछि जे दिल्लीमे पानिक समस्या बढ़ेबाक षड्यंत्र चलि रहल अछि।”
पाइपलाइनक मरम्मत करबामे दिल्ली जल बोर्डकेँ छह घंटा लागल। मरम्मत साँझ चारि बजेसँ राति १० बजे धरि चलल। एहि अवधिमे दक्षिण दिल्लीक जल आपूर्तिकेँ रोकय पड़ल। एकर परिणामस्वरूप आइ दक्षिण दिल्ली धरि लगभग २५ प्रतिशत कम पानि पहुँचल। ओ पूछलखिन, “ई कोन लोक छथि जे दिल्लीक जल व्यवस्था के बिगाड़बाक षड्यंत्र कऽ रहल छथि ?”
ओ आगू कहलनि “एहि समय कोनो बेईमानी आ तोड़फोड़ दिल्लीक लोकक समक्ष पहिनेसँ विद्यमान पानिक कमीकेँ आओर खराब कऽ देत। हम अहाँक सहयोगक लेल धन्यवाद देबए चाहैत छी।”
