पहलगाममे भेल आतंकी हमलाक बाद भारतीय सेना केर एयर स्ट्राइक ‘ऑपरेशन सिंदूर’ केर सफलता पर जतय भारतमे जश्नक माहौल अछि। ओतय पाकिस्तानक प्रधानमंत्री शहबाज शरीफ पहिल बेर कबूल कएलनि जे भारतीय सेना रावलपिंडीकेँ नूर खान एयरबेस पर 9-10 मईकेँ रातिमे एयर स्ट्राइक कएलक।
भारत द्वारा एयर स्ट्राइकमे कतेको पाकिस्तानी एयरबेस पर मिसाइल हमला कएल गेल। शरीफ ई बयान “यौम-ए-तशाकुर” (धन्यवाद) नामक भव्य समारोहमे अपन भाषणक दौरान देलनि। इस्लामाबादमे प्रतिष्ठित स्थल “द मॉन्यूमेंट” पर आयोजित समारोहक दौरान, पाकिस्तानक प्रधानमंत्री घटनाक्रमक विवरण दैत कहलनि कि एकर बाद हम भारत पर जबाबी कारवाई कयलौंह।
शरीफ कहलनि, “9 आ 10 मईकेँ राति करीब 2:30 बजे सेना प्रमुख मुनिर फोन पर कहलनि कि भारत अपन बैलिस्टिक मिसाइल सभसँ हमरा पर हमला कयलक अछि। एकटा मिसाइल नूर खान एयरबेस पर खसल आ किछु अन्य मिसाइल आओर इलाकामे।” ओ कहलनि कि सेना प्रमुख जनरल असीम मुनीर भारत द्वारा कयल गेल एयर स्ट्राइककेँ पूरा ताकतसँ जवाब देबाक अनुमति माँगैत छथि। भारतक एयर स्ट्राइककेँ बाद पाकिस्तान ड्रोन आ मिसाइलक जरिए हमला कयलक।
पाकिस्तानी प्रधानमंत्रीक भाषणमे शांति वार्ताक आह्वान पर सेहो प्रकाश देल गेल। ओ कहलनि, “हम ओहि सभ मित्र देश सभक लेल बहुत आभारी छी, जे दुनियाक एहि हिस्सामे शांति आ युद्धविरामकेँ बढ़ावा देबाक लेल बहुत सहयोग कयलनि।” शरीफ भारत आ पाकिस्तानक बीच तनाव कम करबाक लेल सऊदी अरब, संयुक्त अरब अमीरात, कतर, कुवैत, ईरान, तुर्की, चीन, ब्रिटेन आ अन्य देशकेँ धन्यवाद देलनि।
ओ संकटक अंतिम समयमे हस्तक्षेप करबाक लेल अमेरिकी राष्ट्रपति डोनाल्ड ट्रंपक विशेष प्रशंसा कएलनि। पाक पीएम कहलनि जे हम राष्ट्रपति ट्रंपकेँ हुनकर नेतृत्वक लेल धन्यवाद कहब आ हुनकर ई दृष्टिकोणक लेल सेहो जे दक्षिण एशियामे जल्दीसँ जल्दी शांति बहाल होयबाक चाही। ओ पथ-प्रदर्शक आ रणनीतिक नेतृत्व काज कएलनि आ दू देशक बीच होबय वला घातक युद्धकेँ टारि देलनि।
