पहलगाम आतंकी हमलामे मृतककेँ गृहमंत्री देलनि श्रद्धांजलि आ प्रभावितसँ कयलनि भेंट

नई दिल्ली
*

केन्द्रीय गृहमंत्री अमित शाह बुधदिन जम्मू-कश्मीरक पहलगाममे आतंकी हमलामे बचल लोकसँ आ पीड़ितक परिवारसँ भेंट कयलनि आ आश्वासन देलनि जे “कायरतापूर्ण” कृत्यक अपराधीसभकेँ न्यायक कटघरामे आनल जायत। ओ श्रीनगरक पुलिस नियंत्रण कक्षमे आतंकी हमलाक पीड़ितक ताबूत पर पुष्पांजलि अर्पित कयलनि।

शाह एक्स पर पोस्टमे लिखलनि “भारी मनसँ पहलगाम आतंकी हमलाक मृतककेँ अन्तिम श्रद्धाञ्जलि देलौं। भारत आतंकक सामने नहि झुकत। एहि कायरतापूर्ण आतंकी हमलाक अपराधीसभकेँ बख्शल नहि जायत।”

मंगलकेँ पहलगाम आतंकी हमलामे 28 नागरिक मृत्यु भेल अछि, जाहिमे बेसी पर्यटक छलाह। ई 2019 मे पुलवामा हमलाक बाद घाटीमे सभसँ घातक हमला अछि।

अधिकारी लोकनि कहलनि जे शोकपूर्ण बातचीतक क्रममे शाह बचल लोकसभकेँ आश्वासन देलनि जे सुरक्षा बल घातक हमलाक अपराधीसभकेँ न्यायक कठघरामे आनबामे कोनो कसरि नहि छोड़त।

एकटा अन्य एक्स पर पोस्टमे गृहमंत्री लिखलनि “पहलगाममे भेल आतंकी हमलामे अपन प्रियजनकेँ गमेबाक पीड़ा प्रत्येक भारतीय अनुभव करैत अछि। एहि दुखकेँ शब्दमे व्यक्त नहि कएल जा सकैत अछि। हम एहि सभ परिवार आ पूरा देशकेँ आश्वासन दैत छी जे निर्दोष लोकक हत्या करयवला एहि आतंकवादीसभकेँ नहि छोड़ल जायत।”

जनतब जे जखनि ई हमला भेल तखनि प्रधानमंत्री नरेन्द्र मोदी सऊदी अरबक दु दिनक यात्रा पर छलथि। हमलाक बाद ओ अपन दौरा बीचमे रद्द कय देलनि आ वापस बुधदिन भोरमे भारत आबि गेलथि। मोदी एहि जघन्य कृत्यक निन्दा कयलनि आ शपथ लेलनि जे हमलावरसभकेँ न्यायक कठघरामे आनल जायत।

ओ मंगलकेँ साँझ एक्स पर पोस्टमे लिखलनि “एहि जघन्य कृत्यक पाछू जे अछि तकरा न्यायक कटघरामे आनल जायत। ककरो बख्शल नहि जाएत। ओकर दुष्ट एजेंडा कहियो सफल नहि होएत। आतंकवादसँ लड़बाक हमर संकल्प अटल अछि आ ई आओर मजबूत होयत।”

हमलाक बाद मंगलकेँ सांझमे गृहमंत्री श्रीनगर जम्मू कश्मीर पहुंचला आ उच्च स्तरीय बैसारक आयोजन भेल। काल्हि जम्मू कश्मीरसँ नई दिल्ली धरि ख़ुफ़िया विभागक बैसार होइत रहल।
जनतब जे एहि हमलासँ देशक तामस चरम सीमापर अछि। राजनीतिक, उद्योग आ फिल्म जगत सेहो एही जघन्य कृत्यक निंदा कयलक अछि। पड़ोसी राष्ट्र नेपाल केर संग अमेरिकाक राष्ट्रपति डोनाल्ड ट्रम्प आ रूसक राष्ट्रपति व्लादिमीर पुतिन सेहो एही घटनाकेँ जघन्य अपराध कहलनि। आ हर संभव आतंकवादसँ निपटबाक लेल भारतक संग ठाढ़ रहबाक अपन प्रतिबद्धताकेँ दोहरौलनि।