पहलगाम आतंकी हमलाक बादसँ भारत आ पाकिस्तानक बीच तनाव काफी बढ़ि गेल आ ई स्थिति एखनो बरकरार अछि। 22 अप्रैलकेँ भेल एहि आतंकी हमलामे 26टा निर्दोष लोक मारल गेल आ 20टा घायल भेल। भारत 7 मईकेँ तड़के भोर ‘ऑपरेशन सिंदूर’ लॉन्च कय एहि आतंकी हमलाकेँ बदला लेलक। पुनः पाकिस्तान भारतक कतेको शहर पर ड्रोन्स आ मिसाइलसँ हमला करय केर कोशिश कयलक, जकरा नाकाम करैत भारत पाकिस्तानी सैन्य ठिकानाकेँ सेहो निशाना बनएलक, जे ‘ऑपरेशन सिंदूर’ केर हिस्सा छल।
पहलगाम आतंकी हमलाक पाछू द रेसिस्टेन्स फ्रंट नामक आतंकी संगठनक हाथ छल, मुदा हमलाक मास्टरमाइंड लश्कर-ए-तैयबाक डिप्टी चीफ सैफुल्लाह कसूरी अछि।पहलगाम आतंकी हमलासँ किछु दिन पहिने सैफुल्लाह भारतकेँ खिलाफ जहर उगलने छल आ आब एक बेर फेर ओहिना विष वमन कयलक अछि।
कसूरी पाकिस्तानक पंजाब प्रांतक लाहौरमे एकटा आतंकी रैलीमे भाग लेलक। पहलगाम आतंकी हमलाक बाद ई पहिल बेर छल जखनि सैफुल्लाह सार्वजनिक रूपसँ सामने आयल। एहि रैलीमे लश्कर-ए-तैयबाक कतेको आतंकवादी आ पंजाब प्रान्तक राजनेता सेहो शामिल भेल। सैफुल्लाह रैलीमे जनताकेँ संबोधित कयलक। ओ कहलक “भारत हमरा पर पहलगाम आतंकी हमलाक आरोप लगओलक आ ई हमरा पूरा दुनियामे प्रसिद्ध कऽ देलक। सैफुल्लाह लगभग २० मिनट धरि रैलीकेँ सम्बोधित कयलक, जाहिमे ओ भारतक विरुद्ध भयंकर विष उगललक।
भारतक ‘ऑपरेशन सिन्दूर’मे पाकिस्तानमे १०० सँ बेसी आतंकवादी मारल गेल छल, जाहिमे मुदासिर अहमद नामक एकटा खूंखार आतंकवादी सेहो शामिल छल। सैफुल्लाह रैलीमे वादा कयलक जे ओ अहमदक नामपर एकटा अस्पताल बनाओत।
लाहौरमे भेल एहि रैलीक आयोजन लश्कर-ए-तैयबाक राजनीतिक शाखा पाकिस्तान मरकजी मुस्लिम लीग – पीएमएमएल (पाकिस्तान मरकज़ी मुस्लिम लीग) केर द्वारा कएल गेल। एहि रैलीमे शामिल आतंकी भारतक विरोधमे खूब बयानबाजी कएलक आ संगहि पाकिस्तानक परमाणु परीक्षणक वर्षगांठक जश्न मनौलक।
पहलगाम आतंकवादी हमलाक चारि दिन पहिने सैफुल्लाह पीओकेमे एकटा रैलीमे भारत, पीएम नरेंद्र मोदी आ हिंदुक खिलाफ खूब जहर उगलने छल आ कश्मीरमे जिहाद पसारय आ कत्लेआम मचयबाक धमकी देने छल। पहलगाम आतंकवादी हमलाक बाद जखनि भारत सरकार चेतावनी देलक कि एहि केर पाछू एकर हाथ अछि, माफ नहि कएल जायत, तँ सैफुल्लाह अपन जान पर खतरा देखैत दुनियांक सामने गिड़गिड़ाय लागल। लश्कर कमांडर एकटा वीडियो जारी कय कहलक, “हम किछु नहि कयलौंह। भारत हमरा पर आ पाकिस्तान पर एहि हमलाक झूठ आरोप लगा रहल अछि। एहिसँ दुनियाभरिमे पाकिस्तानक प्रतिष्ठाकेँ नुकसान भऽ रहल अछि। पहलगाममे भेल आतंकवादी हमलाक पाछू जाकर हाथ होय मुदा, ओकरा संग हमर कोनो लेना-देना नहि अछि।”
