बिहार विधानसभा चुनावमे सब राजनीतिक दल विशिष्ट लोक लुभावन वादा कय रहल अछि। आब नेता प्रतिपक्ष तेजस्वी यादव डोमिसाइल नीतिक लेल पैघ वादा कऽ देलनि अछि।
इंडिया गठबंधनक समन्वय समितिक अध्यक्ष तेजस्वी यादव घोषणा कएलनि जँ हुनकर सरकार बनल तँ बिहारमे सौ प्रतिशत डोमिसाइल नीति लागु करब। एहीसँ बिहारक नौकरी एहिठामक निवासीकेँ भेटत। तेजस्वीक एही घोषणाक बाद राजद समर्थक तेजस्वी यादवक धन्यवाद दैत सोशल मीडिया पर कहलनि जे सभ प्रतियोगिता परीक्षाक फॉर्म नि:शुल्क होयत। परीक्षा केन्द्र धरि पहुँचबाक लेल सरकार पैसा देत।
राजद समर्थक कहलनि कि हमर नेता तेजस्वी यादव जाति जनगणनासँ सामाजिक न्याय करताह। रोटी रोजगार दऽ आर्थिक न्याय करताह। समर्थक कहलनि कि तेजस्वी यादव जे कहलनि से बुझू पूरा भेल। रोजगारक वादा कएलनि, से पूरा कएलनि। युवाकेँ रोजगार देलनि। डोमिसाइल नीति पर तेजस्वी यादव केर बयानक वीडियो राजद समर्थक खूब शेयर कऽ रहल अछि।
जनतब जे बिहारक युवाक एकटा पैघ वर्ग डोमिसाइल नीति लागू करऽ केर माँग करैत अछि। ओ कतेको बेर नीतीश सरकारक खिलाफ प्रदर्शन सेहो कए चुकल अछि।
डोमिसाइल नीति पर तेजस्वी यादवक बयान पर भारतीय जनता पार्टी तंज कएलक। भाजपा प्रवक्ता प्रभाकर मिश्रा कहलनि जे हुनका ज्ञात अछि जे हुनकर सरकार नहि बनत। एही कारणें, हुनकर पूर्ण नहि होयवला वादा अछि। नेता प्रतिपक्षक डोमिसाइल नीति केर जमीनी हकीकत बुझबाक चाही। बिहारक युवा केवल बिहारमे नहि, अन्य राज्यमे सेहो सरकारी नौकरी कय रहल अछि। जँ तेजस्वी यादवक तरहेँ अन्य राज्यमे एहेन होयत तँ बिहारक युवा बाहरक राज्यमे नौकरी नहि कय पायत। प्रभाकर मिश्रा कहला जे बिहारक लोक देशभरिमे अपन प्रतिभासँ पहिचानल जाइत अछि, हुनका सीमित करब राज्यहितमे नहि अछि।
