कांग्रेस सांसद राहुल गांधी राष्ट्रीय पात्रता प्रवेश परीक्षा (नीट) पर सवाल उठौलनि अछि। मंगलदिन राहुल गाँधी कहलनि जे बिहार, गुजरात आ हरियाणामे भेल गिरफ्तारीसँ पता चलैत अछि जे परीक्षामे व्यवस्थित रूपसँ संगठित भ्रष्टाचार भेल अछि।
ओ आरोप लगओलनि जे भाजपा शासित राज्य पेपर लीकक केंद्र बनि गेल अछि। नरेन्द्र मोदी नीटमे २४ लाखसँ बेसी छात्रक भविष्यक संग खेलवाड़ पर पहिलुक जकाँ चुप छथि। हम अपन न्यायपत्रमे गारंटी देने छलहुँ जे पेपर लीकक विरुद्ध सख्त कानून बना कऽ युवाक भविष्य सुरक्षित कयल जाय। आब विपक्षक दायित्व निभाबैत हम देशभरिक युवाक आवाज सड़कसँ संसद तक मजबूतीसँ उठायब।
ओ कहलनि “हम सरकार पर कठोर नीति बनेबाक लेल दबाव बनेबाक लेल प्रतिबद्ध छी।”
कांग्रेस नीटक स्वतंत्र फोरेंसिक जाञ्चक माँग कयलक अछि। एकटा उदाहरण दैत कांग्रेस कहलक जे एहि साल नीटमे ६०० अंक प्राप्त कयनिहार अभ्यर्थीक संख्या ८०,४६८ अछि। जखनिकि, सरकारी मेडिकल कॉलेजमे मात्र ५५ हजार सीट अछि, तखनि एहि छात्रसभकेँ सरकारी कॉलेजमे प्रवेश कोना भेटत।
कांग्रेसक कहब अछि जे मोदी सरकार आ शिक्षा मंत्रीकेँ नीट घोटालामे सर्वोच्च न्यायालयक देखरेखमे स्वतंत्र फोरेंसिक जाञ्चक आदेश देबाक चाही। पीएम मोदीकेँ सेहो एहि विषय पर अपन बयान देबाक चाही।
कांग्रेस कहलक अछि जे बहुत रास छात्र छलाह जिनका १२म कक्षा पास करबाक लेल संघर्ष करय पड़लनि। लेकिन, ओ छात्र नीटमे उत्कृष्ट अंक प्राप्त कयलक अछि। अतः १२म बोर्डक अंककेँ नीटक अंकसँ सहसंबंधित कयल जयबाक चाही। जँ आँकड़ासँ पता चलैत अछि जे हजारो लोक बोर्ड परीक्षामे कम अंक आ नीटमे बहुत बेसी अंक प्राप्त कयने छथि तखन पेपर लीकक आरोप सत्य अछि।
