वक्फ बिलकेँ लऽ कऽ सड़कपर संघर्ष शुरू भऽ गेल अछि। संसदक बजट सत्रक दोसर चरण चलि रहल अछि, आ वक्फ संशोधन विधेयक अगिला सप्ताह सदनमे प्रस्तुत कयल जा सकैत अछि। ई विधेयक ८ अगस्त, २०२४ केँ लोकसभामे प्रस्तुत कयल गेल छल, मुदा हंगामाक बाद एकरा जेपीसीकेँ पठाओल गेल। मुदा, सरकार एहि विधेयककेँ कोनो समय पारित करबाक लेल लोकसभामे आनि सकैत अछि।
एहि विधेयकसँ मुस्लिम सङ्गठनक सङ्ग-सङ्ग विपक्षी दलसभ सेहो आक्रोशित भेल अछि। विपक्षीक आरोप अछि जे सरकार एहि विधेयकक माध्यमसँ वक्फ सम्पत्ति जब्त करय चाहैत अछि। मोदी सरकारकेँ घेरबाक उद्देश्यसँ विपक्ष ऑल इंडिया मुस्लिम पर्सनल लॉ बोर्डक संग दृढ़तासँ ठाढ़ प्रतीत होइत अछि।
एम्हर एआईएमआईएम (ऑल इंडिया मजलिस-ए-इत्तेहाद-उल मुस्लिमीन) केँ अध्यक्ष असदुद्दीन ओवैसी केंद्र सरकारक प्रमुख सहयोगी दल नीतीश कुमार आ चंद्रबाबू नायडूकेँ चेतौनी देलनि अछि जे जँ ओ वक्फ विधेयकक समर्थन करैत छथि तँ भारतक मुसलमान जाबति धरि दुनियाक अस्तित्व अछि ताबति धरि ई याद राखत। दोसर दिसि, जेपीसीक अध्यक्ष जगदम्बिका पाल कहलनि अछि जे ई मात्र राजनीतिक विरोध अछि। विधेयक एखनि धरि पेश तक नहि कयल गेल अछि, मुदा विपक्ष पहिनेसँ विरोध करब शुरू कऽ देने अछि।
जनतब जे वक्फ बोर्डक देशमे ९००,००० एकड़सँ बेसी सम्पत्ति अछि आ एकटा आओर आश्चर्यजनक तथ्य ई अछि जे रेलवे आ रक्षाक बाद वक्फ बोर्डक लग देशमे सबसँ बेसी सम्पत्ति अछि। वर्तमानमे वक्फ विधेयककेँ लऽ कऽ सदनसँ लऽ कऽ सड़क धरि राजनीतिक लड़ाई शुरू भऽ गेल अछि। आइ ऑल इंडिया मुस्लिम पर्सनल लॉ बोर्ड दिल्लीक जंतर-मंतर पर विरोध प्रदर्शन कयलक, जाहिमे असदुद्दीन ओवैसीक संग समाजवादी पार्टी आ कांग्रेसक कतेको मुस्लिम सांसद शामिल छलाह। मुदा, दोसर दिसि हिन्दू राष्ट्रवादी सङ्गठन वक्फ संशोधन विधेयकक समर्थनमे प्रदर्शन कयलक।
