ऑपरेशन सिंदूर’क बाद बिहारमे सियासी घमासान तेज होबए वला अछि। पीएम मोदी बिक्रमगंजमे रैलीकेँ संबोधित करबा लेल आबि रहल छथि। राहुल गांधीक दौराकेँ सेहो अंतिम रूप देल जा रहल अछि। ‘ऑपरेशन सिंदूर’ आ भारत पाकिस्तान संघर्ष विरामक बाद बिहारक सियासी पारा चढ़यवला अछि।
विधानसभा चुनावक मद्देनजर राजनीतिक दल सभ तैयारी तेज कय लेलक अछि। कांग्रेस सेहो एक्शन मोडमे अछि। बिहारक धरती पर कांग्रेसक दिग्गज सभक दौरा जारी अछि। एहि कड़ीमे नेता विपक्ष राहुल गांधी चारिम बेर बिहार दौरा पर आबि रहल छथि। राहुल गांधीक 15 मईकेँ दौरा प्रस्तावित अछि। गयामे कांग्रेस सांसद पार्टी नेता आ कार्यकर्ता सभक संग बैसार करताह।
बैसारमे चुनावी तैयारी आ संगठन विस्तार पर चर्चा होयत। कहल जा रहल अछि जे कांग्रेस सांसद दरभंगाकेँ दौरा कय सकैत छथि। हालांकि एखनि औपचारिक घोषणा होयबाक बाकी अछि। राहुल गांधीक कार्यक्रमक घोषणा एक-दू दिनमे कय देल जायत। कांग्रेसक राष्ट्रीय नेता सभक आगमन शुरू होबयवला अछि। बिहार कांग्रेस राष्ट्रीय नेता सभकेँ बजा कय संगठनमे जान फूंकबाक प्रयास कय रहल अछि। संगठनकेँ धार देबाक आ कार्यकर्ताकेँ एकजुटता लेल राष्ट्रीय नेता सभक दौरा करायल जायत।
बिहार यात्रा पर आबि रहल नेता सभक सूची तैयार कयल जा रहल अछि। कांग्रेस स्पष्ट कय देलक अछि जे चुनाव महागठबंधनमे रहि कए लड़ल जायत। चुनावी तैयारिक संग-संग कांग्रेस संगठनकेँ सेहो धार देबयमे जुटल अछि। पिछला बेर 70 सीट पर चुनाव लड़यवला कांग्रेसक झोलीमे 19 सीट आयल छल। एहि बेर बेसी सीट हासिल करबाक लेल राजद पर दबाव बनाओल जा रहल अछि।
ऑपरेशन सिंदूरक बाद पीएम मोदी सेहो पहिल बेर बिहार आबि रहल छथि। पीएम मोदीक बिहार दौरा मईकेँ आखिरी सप्ताहमे प्रस्तावित अछि। रोहतास जिलाक बिक्रमगंजमे रैलीकेँ पीएम मोदी संबोधित करताह। मानल जा रहल अछि जे 25 सँ 30 मईकेँ बीच प्रधानमंत्रीक कार्यक्रम तय कएल जा सकैत अछि। अगिला 4-5 दिनमे औपचारिक ऐलान कएल जायत। पीएम मोदीक रैली लेल बीजेपीमे बैसारक दौर जारी अछि। सभा स्थल पर लाखोंक भीड़ जमा करबाक लक्ष्य राखल गेल अछि। सभ मोर्चा पर तैयारिक गति तेज कय देल गेल अछि।
