भारतक राष्ट्रीय सुरक्षा सलाहकार अजीत डोवल शुक्रकेँ ‘ऑपरेशन सिंदूर’ केर संबंधमे अपन पहिल बयान देलनि। अभियानक सफलता पर उठल सवालकेँ ओ पूर्ण रूपसँ खारिज कय देलनि। विदेशी मीडिया केर चुनौती देलनि जे जँ हुनका लग भारतक नुकसानक कोनो सबूत अछी तऽ पेश करय।
आईआईटी मद्रासके 62म दीक्षांत समारोहमे अजीत डोभाल कहलनि, हम चुनिंदा तरीकासँ पाकिस्तानमे नुकायल नौ आतंकी जगहकेँ निशाना बनेलहुं। ई सब सीमावर्ती इलाका नै छल, बल्कि एहेन जगह छल जतय हमरा सबकेँ पक्का विश्वास छल जे आतंकी मौजूद अछि। हमर सभक एक्कहुटा निशाना नहि चूकल आ नहि कोनो आन स्थान पर हमला कयलहुँ। ई हमला पूर्ण रूपसँ सही आ पूर्व निर्धारित जनतबक आधार पर कयल गेल छेल। पूरा ऑपरेशन मात्र 23 मिनटमे पूरा भऽ गेल। एहि दौरान भारतीय वायुसेना आ सुरक्षा एजेंसी सब मिलिकय एहेन सामरिक एकता देखौलक जे पूरा दुनिया लेल एकटा उदाहरण बनि गेल।
ओ कहलनि जे, विदेशी मीडिया कोनो फोटो वा उपग्रहक तस्वीर नहि देखा सकल आ नहि ओ बता सकल जे की नुकसान भेल। एनएसए कहलनि, “विदेशी प्रेस कहैत रहल जे पाकिस्तान ई काज कयलक, ई कयलक, मुदा हमरा एकटा फोटो देखाउ जाहिमे भारतक नुकसान देखाओल गेल अछि, एकटा टूटलो गिलास देखाउ। हमरा सबकेँ किछु नहि टूटल। हम सब एतेक सटीक छलहुं जे हमरा सबकेँ पता चलल जे के कतय अछि।”
ओ चुनौती देलनि, “हमरा एकटा फोटो वा सैटेलाइट इमेज देखाउ जे भारतक कोनो तरहक नुकसान भेल, कांचक खिड़की धरि जँ टूटल होय।” भारतीय सेनाक आधुनिक तकनीक आ रणनीति केर एहि पूरा अभियानमे अहम भूमिका छल।
ओ कहलनि कि हमरा सबकेँ एहि बात पर गर्व अछि कि एहि अभियानमे ब्रह्मोस, इंटीग्रेटेड एयर कंट्रोल आ कमांड सिस्टम एवं बैटलफील्ड निगरानी सन देशी आ अत्याधुनिक प्रणालीक भूमिका निर्णायक छल। हम हुनका लोकनिक स्थितिक सही अनुमान लगा ओहि अड्डा पर हमला कयलहुं।
डोभाल चुटकी लैत कहलनि जे विदेशी मीडिया बड़का दावा कयलक, मुदा ओकरा लग कोनो सबूत अछि कि नहि ? न्यूयॉर्क टाइम्स बहुत लिखलक, मुदा की ओ सब एहन कोनो वैध चित्र देखौलक जे भारतक भेल नोकसानक पुष्टि कय सकय ?
