रक्षा मंत्री राजनाथ सिंह काल्हि शुक्रकेँ गुजरातक भुज एयर बेससँ भारतीय वायुसेनाक जवान सभकेँ संबोधित कय रहल छलाह, तँ पड़ोसी देश पाकिस्तानकेँ एक बेर फेर चेतावनी देलाह आ कहलाह जे ‘ऑपरेशन सिंदूर’ एखनि खत्म नहि भेल अछि। जे किछु भेल, ओ मात्र एकटा ट्रेलर छल। जखनि सही समय आएत तँ हम पूरा पिक्चर दुनियाकेँ देखायब।
रक्षा मंत्री ‘ऑपरेशन सिंदूर’ पर सेनाक सफलता पर बधाई दैत कहलाह जे हम बस एतबे कहब जे अपनेक पराक्रम एहि बातकेँ दर्शा देलक जे ई ओ सिंदूर अछि, जे श्रृंगारक नहि, बल्कि शौर्यक प्रतीक अछि। ई ओ सिंदूर अछि, जे सौंदर्यक नहि, बल्कि संकल्पक प्रतीक अछि। ई सिंदूर, खतरा केर ओ लाल लकीर अछि जे भारत आब आतंकवादक माथ पर खींचि देलक अछि। हम एहि अवसर पर, अहाँ सभक संग-संग, देशक जनताकेँ सेहो आभार प्रकट करैत छी। भारतक जनता, एकजुटता आ समझदारीक परिचय दऽ कऽ अहाँक सहयोग कएलक। एहि लड़ाईमे नहि केवल सरकार, आर्म्ड फोर्सेज आ सुरक्षाबल एकजुट छल, बल्कि भारतक हर नागरिक, एकटा सिपाहीक तरह एहिमे भागीदार बनल।
ओ कहलनि कि हम, हमर आराध्य श्रीरामक ओहि मार्ग पर बढ़ि रहल छी, जाहिमे ओ आसुरी शक्तिक विनाश करबाक प्रण लेने छलथि। ‘निसिचर हीन करउँ महि, भुज उठाइ पन कीन्ह।’ अर्थात जाहि प्रकार भगवान राम अपन भुजाकेँ उठाकऽ धरतीकेँ राक्षस विहीन करबाक प्रण लेलनि। ठीक ओहिना, प्रभु श्री रामक आदर्श सभक पालन करैत, हमहुँ आतंकवादकेँ, जड़िसँ खत्म करबाक संकल्प लेलहुँ।
राजनाथ सिंह कहलनि, “अपने सभ पाकिस्तानमे मौजूद आतंकवादी बुनियादी ढाँचाक खिलाफ प्रभावी कार्यवाही केलहुँ अछि, मुदा, पाकिस्तान ध्वस्त भेल आतंकवादी ढाँचाकेँ फेरसँ ठाढ़ करबाक प्रयासमे लागल अछि। ओहिठामक सरकार पाकिस्तानी आम लोकसँ लेल गेल टैक्स जैश-ए-मोहम्मद जेहेन आतंकवादी, मसूद अजहरकेँ करीब 14 करोड़ रुपैया देबामे खर्च करत। जखनि कि ओ यूएनसँ आतंकवादी घोषित भऽ चुकल अछि। पाकिस्तान अंतर्राष्ट्रीय मुद्रा कोष (आईएमएफ) सँ प्राप्त धनक एकटा पैघ हिस्सा अपन देशमे आतंकवादी बुनियादी ढाँचा पर खर्च करत, एहेन हमर विश्वास अछि। भारत चाहैत अछि कि आईएमएफ पाकिस्तानकेँ देल जाए वाला वित्त पोषण पर पुनर्विचार करए आ आगू सेहो किछु प्रकारक सहायता देबासँ आईएमएफ परहेज करए।”
ओ कहलनि कि अपने सभ बुझि रहल होयब कि भारतमे जखनि कतौ किछु उपद्रवी तत्व पैदा होइत अछि आ जँ ई आशंका रहैत अछि कि ई भविष्यमे किछु उपद्रव कय सकैत अछि, तँ ओकरा मजिस्ट्रेट आ पुलिस द्वारा गुड बिहेवियरक प्रोबेशन पर राखल जाइत अछि। जँ ओ व्यक्ति प्रोबेशनक दौरान कोनो शरारत करैत अछि, तँ ओकरा उचित दंड देल जाइत अछि। ठीक ओहि तरहेँ, वर्तमान सीजफायरमे, हम पाकिस्तानकेँ बिहेवियरक आधार पर एखनि प्रोबेशन पर रखने छि। जँ ओकर बिहेवियर सुधरैत अछि तँ ठीक आ जँ बिहेवियरमे फेरसँ गड़बड़ी अबैत अछि तँ ओकरा दंड भेटत। हम फेरसँ कहि रहल छी, पाकिस्तानकेँ हम प्रोबेशन पर रखने छि। प्रधानमंत्री हालमे एकटा बात बहुत स्पष्ट कहने छथि जे आतंक पर प्रहार आब न्यू नॉर्मल अछि। ई न्यू इंडियाक न्यू नॉर्मल अछि। आब हम ई स्पष्ट कऽ देलहुँ अछि जे हमर संप्रभुताकेँ यदि कियो नुकसान पहुँचाबैत अछि, तँ ओ प्रहार सेहो झेलत। आतंकवादक हम जोरदार आ करारा जवाब देब।
