‘एक राष्ट्र, एक चुनाव’क रामनाथ कोविंदक रिपोर्टकेँ मोदी मंत्रिमंडलक मंजूरी
नई दिल्ली
*
मोदी मंत्रिमंडल द्वारा बुधकेँ ‘एक राष्ट्र, एक चुनाव’ प्रस्तावकेँ मंजूरी देल गेल अछि। सूत्रक अनुसार रामनाथ कोविन्दक रिपोर्टकेँ कैबिनेट मंजूरी दऽ देलक अछि। एकर बाद देशमे एक राष्ट्र एक चुनाव करय केर तरीका आसान भऽ गेल अछि। एहिसँ पहिने केन्द्रीय गृह मंत्री अमित शाह आ केन्द्रीय मंत्री अश्विनी वैष्णव मोदी सरकारक तेसर कार्यकालक १०० दिन पूरा भेलाक अवसर पर प्रेस कॉन्फ्रेंस कऽ सरकारक उपलब्धिक सूची जारी कयने छलाह।
अपन पछिला कार्यकालमे मोदी सरकार पूर्व राष्ट्रपति रामनाथ कोविन्दक अध्यक्षतामे ‘एक राष्ट्र, एक चुनाव’ पर एकटा समितिक गठन कयने छल।
रामनाथ कोविंद समितिक देशमे एक संग चुनाव करय केर संभावना पर रिपोर्ट देबाक जिम्मेदारी देल गेल छल। समिति एहि साल मार्चमे राष्ट्रपति द्रौपदी मुर्मूकेँ अपन रिपोर्ट सौंपलक।
मोदी कैबिनेट बैठकमे रिपोर्ट पर चर्चा भेल आ सैद्धांतिक रूपसँ एकरा मंजूरी देल गेल।
हालहिमे अमित शाह सरकारक ओही कार्यकालमे एक राष्ट्र, एक चुनाव लागू करबाक बात सेहो कयने छलाह।
समितिक सिफारिश अछि :
पहिल चरणमे सबटा राज्य विधानसभा चुनाव लोकसभाक संग होएबाक चाही।
दोसर चरणमे लोकसभा-विधानसभाक संग स्थानीय निकाय चुनाव होयबाक चाही।
पूरा देशमे सभ चुनावक लेल एकल मतदाता सूची होएबाक चाही।
मतदाता पहचान पत्र सेहो सबहक लेल समान हेबाक चाही।
