मैथिली अकादमीक उपेक्षाक विरुद्ध चेतना समितिक सदस्यगणक एक दिवसीय धरना
पटना समदिया!! चेतना समिति, पटनाक सदस्यगण कंपकंपाईत ठिठुरैत ठंडमे जानक परवाह कयने बेगैर मैथिली अकादमीक निरन्तर उपेक्षाक विरुद्ध रविकेँ धरना पर बैसल छलथि।
जनतबक अनुसार एहि धरनामे चेतना समितिक अध्यक्ष विवेकानन्द झा, उपाध्यक्ष उमेश मिश्र, सचिव जयदेव मिश्र, किशोर चौधरी, आचार्य आशुतोष मिश्र, नारायण झा सहित अनेकानेक गणमान्य व्यक्ति कतारबद्ध रूपसँ उपस्थित छलथि।
धरनाक माध्यमसँ समिति मैथिली भाषा, साहित्य आ संस्कृति केर शीर्षस्थ संस्था मैथिली अकादमीकेँ पुनः सक्रिय करबाक मांग कऽ रहल छल। धरनास्थलसँ चेतना समितिक सचिव कहलनि जे वर्षोसँ अकादमी उपेक्षित अछि, कर्मचारीविहीन भऽ गेल अछि आ एकर मूल उद्देश्य क्षीण होइत जा रहल अछि, जे सम्पूर्ण मिथिला आ मैथिली भाषा-भाषी सभ लेल गम्भीर चिन्ताक विषय अछि।
चेतना समितिक अध्यक्ष बिहार सरकारसँ स्पष्ट आग्रह कएने छथि जे मैथिली अकादमीकेँ जल्दसँ जल्द पूर्ण रूपेण पुनः आरम्भ कएल जाय, आवश्यक पद भरल जाय आ अकादमीकेँ सक्रिय, स्वायत्त आ प्रभावी बनाओल जाय। ई मांग मात्र कोनो संस्था विशेषक नहि, बल्कि सम्पूर्ण मैथिली आ मिथिलावासीक जनभावनाक प्रतिनिधित्व करैत अछि।
समिति कहलनि जे जँ शीघ्र सकारात्मक पहल नहि भेल, तऽ आन्दोलन आरो व्यापक रूप लेत।