प्रधानमंत्री नरेन्द्र मोदी वाढ़वण बन्दरगाह परियोजनाक आधारशिला रखलनि आ विकास कार्यक शुभारम्भ कयलनि। प्रधानमंत्री नरेन्द्र मोदी महाराष्ट्रक पालघरमे कहलनि, “आइ एहि आयोजनक विषयमे गप्प करबासँ पहिने हम अपन हृदयक भावना व्यक्त करय चाहैत छी। २०१३ मे जखनि भाजपा हमरा प्रधानमंत्रीक उम्मीदवार घोषित कयलक, तखनि हम सभसँ पहिने रायगढ़ किला जा कऽ छत्रपति शिवाजी महाराजक समाधिक सामने बैसि प्रार्थना आ आशीर्वाद लेलहुँ। हालहिमे सिंधुदुर्गमे जे किछु भेल, हमरा आ हमर सभ सहकर्मीक लेल छत्रपति शिवाजी महाराज मात्र एकटा नाम नहिं अछि, हमरासभक लेल छत्रपति शिवाजी महाराज हमर आराध्य देवता छथि। आइ हम अपन आराध्य भगवानक चरणमे माथ राखि क्षमा मांगैत छी।
नरेन्द्र मोदी कहलनि, “हमर संस्कार अलग अछि, हम ओ लोक नहिं छी जे भारत माताक महान सपूत वीर सावरकरकेँ गारि दैत रहैत छथि, हुनकर अपमान करैत रहैत छथि, देशभक्तिक भावनाकेँ कुचलैत रहैत छी, आ ओकर बावजूद माफी माँगय लेल तैयार नहिं होइत छथि। एहेन महान सपूत सभक अपमान करय केर बादो जिनका पश्चाताप नहिं होय, तिनकर संस्कार महाराष्ट्रक जनता जानि जाइथ।”
मोदी कहलनि, “महाराष्ट्रक विकास यात्राक आजुक दिन ऐतिहासिक अछि, भारतक विकास यात्राक लेल ई एकटा पैघ दिन अछि। विकसित महाराष्ट्र विकसित भारतक संकल्पक सबसँ महत्वपूर्ण हिस्सा अछि, तेँ महाराष्ट्रक लेल लगातार पैघ निर्णय लेल गेल अछि। महाराष्ट्रमे विकास लेल पैघ सामर्थ्य अछि, संसाधन अछि, समुद्री तट अछि आ एहि तटसभसँ अन्तर्राष्ट्रीय व्यापारक सदियों पुरान इतिहास आ भविष्यक अपार सम्भावना अछि। वाढ़वण बन्दरगाहक आधारशिला आइ राखल गेल अछि जाहिसँ महाराष्ट्र आ देशकेँ एहि अवसरक पूरा लाभ भेटय।
महाराष्ट्रक मुख्यमंत्री एकनाथ शिंदे कहलनि, “प्रधानमंत्री मोदी मुम्बईकेँ वैश्विक फिनटेक हबक रूपमे बदलबाक घोषणा कयलनि अछि। फिनटेक प्रौद्योगिकी २०३० धरि भारतकेँ ६० ट्रिलियन डॉलरक अर्थव्यवस्था बनयबामे योगदान दऽ सकैत अछि जाहिमे महाराष्ट्रक प्रमुख योगदान भऽ सकैत अछि। हम इहो आश्वासन दैत छी जे महाराष्ट्र २०२६ धरि भारतक ५ ट्रिलियन डॉलरक लक्ष्यकेँ साकार करबामे प्रमुख भूमिका निभाओत। इ हमर वादा अछि।
