बिहारमे गोलीबारी, हत्या आ बलात्कारक बढ़ैत घटनाक पर तेजस्वी यादव चिंता व्यक्त कयलनि। ओ कहलनि जे बढ़ैत अपराधक समीक्षा लेल कोनो बैसार नहि बजाओल जाइत अछि।
नेता प्रतिपक्ष तेजस्वी यादव सोमदिन (19 मई, 2025) जोरदार हमला कयलनि। क़ानून व्यवस्थाक मुद्दा उठाबैत ओ कहलनि जे सभ जिलामे व्यवसायी केर हत्या होइत अछि। ओ कहलनि, “हम किछु कहब तँ हमरे गरिएताह आ कहता 2005 केँ पहिने की होइत छल ? पटनामे पांच-पांच गोलीबारीक घटना भेल अछि। अपराधी सभकेँ सरकार द्वारा छूट देल गेल अछि। नीतीश कुमार बिलकुल अचेत अवस्थामे छथि।”
नेता प्रतिपक्ष बच्ची सभक संग अत्याचारक घटना पर चिंता व्यक्त कएलनि। हुनक कहब छल जे बढ़ैत अपराधक समीक्षा पर एक्कोटा बैसार नहि होइत अछि। कानून व्यवस्था बिहारमे भयावह छै।
ऑफसरशाही पर ओ नीतीश सरकारकेँ कटघरामे रखलनि। तेजस्वी यादव कहलनि, “मुख्यमंत्री नीतीश कुमारकेँ सही जानकारी नहि देल जा रहल अछि। पढ़बाक लेल बस एक टा कागज थमा देल जाइत अछि। अधिकारीक कहला पर मुख्यमंत्री निरीक्षण करय लेल जाइत छथि। बिहारमे ऑफसरशाही बेलगाम भऽ गेल अछि।
ओम्हर चिराग पासवानक मुख्यमंत्री नीतीश कुमारसँ अप्रत्याशित भेंट बिहारमे राजनीतिक हलचल तेज कए देलक अछि। दुनू नेता सभक भेंटकेँ तेजस्वी यादव निजी बतौलनि। ओ बेसी किछु कहबासँ परहेज कएलनि। ओ कहलनि “बस हिनकर सभक काज लालू प्रसाद यादवकेँ गरियायब अछि। हम किछु कहब तँ हमरो गरियेताह आ कहल जायत 2005 सँ पूर्व किछु छल की।”
तेजस्वी यादव कहलनि कि 2005 मे जन्मल बच्चा आब युवा भऽ गेल अछि। युवाक भविष्यक चिंता होयबाक चाही। हिनका सभकेँ नौकरी, रोजगार देबाक बदला लालू प्रसाद आ तेजस्वी यादवक खिलाफ मीडियामे बयान देबय केर काज बस रहि गेल अछि।
