बिहार बीजेपी अध्यक्ष दिलीप जायसवाल कहला जे देशक संस्कृति, विचारधारा आ विरासतकेँ आगाँ बढ़ेबाक काज बीजेपी करत। आबि रहल समयमे भारत विश्व गुरू बनत।
भारतीय जनता पार्टी रविकेँ अपन 46म स्थापना दिवस मना रहल छल। एहि अवसर पर पटना बीजेपी कार्यालयमे बिहारक उपमुख्यमंत्री सम्राट चौधरी, बीजेपी प्रदेश अध्यक्ष दिलीप जायसवाल दीनदयाल उपाध्याय आ श्यामा प्रसाद मुखर्जीकेँ श्रद्धांजलि देलनि। एहि अवसर पर बूथ स्तरसँ ल’ क’ विधानसभा स्तर तक सम्मेलन आ कार्यक्रम आयोजित कएल जा रहल अछि। स्थापना दिवस समारोह 6 अप्रैलसँ 12 अप्रैल धरि आयोजित होयत।
एहि अवसर पर बिहारक उपमुख्यमंत्री सम्राट चौधरी कहला, “डॉ श्यामा प्रसाद मुखर्जी, पंडित दीनदयाल उपाध्याय, श्रद्धेय अटल बिहारी वाजपेयी, लाल कृष्ण आडवाणी जी जे एहि भारत केँ अखंड भारत बनेबाक जे सपना देखलन्हि, आइ प्रधानमंत्री मोदीक नेतृत्वमे ई भारत निरंतर आगाँ बढ़ि रहल अछि। आइ अखंड भारतक सपना साकार भ’ रहल अछि, श्रेष्ठ आ समृद्ध भारत बनेबाक काज चलि रहल अछि।
ओतहि बिहार बीजेपी अध्यक्ष दिलीप जायसवाल कहला, “आइ भाजपा केर स्थापना दिवस अछि। आइ हम बहुत जोश आ उमंग संग प्रदेश, जिला आ बूथ स्तर पर स्थापना दिवस मनाबए केर काज क’ रहल छी। हम भाजपा केर नेतृत्व (पंडित दीनदयाल उपाध्याय, डॉ. श्यामा प्रसाद मुखर्जी, लाल कृष्ण आडवाणी आदि)क आभार व्यक्त करैत छी। हुनक बताओल मार्ग पर देशक संस्कृति, विचारधारा आ विरासत केर आगू बढ़ेनाई भाजपाक संकल्प अछि। आबयवाला समयमे भारत विश्व गुरू बनत।”
एहिसँ पहिने पीएम मोदी अपन सोशल मीडिया प्लेटफॉर्म एक्स पर पोस्ट कएलनि जे “ई दिन पार्टीक देशक प्रगति लेल अपन प्रतिबद्धता दोहराएबाक अवसर प्रदान करैत अछि।”
ओ कहला जे पाछुक वर्षमे पार्टी केर मिलल ऐतिहासिक जनादेश ई स्पष्ट क’ देलक अछि जे लोक भाजपाक सुशासनकेँ पहिचान रहल छथि। 2014 में पार्टी ऐतिहासिक जीत प्राप्त कयने अछि।
जनतब जे भारतीय जनता पार्टीक स्थापना 1980 मे भेल छल, मुदा पार्टीक इतिहास ताहिसँ बेसी पुरान अछि। एकर जड़ि 1951 मे श्यामाप्रसाद मुखर्जी द्वारा गठित भारतीय जनसंघमे अछि। 1990 केर दशकमे अटल बिहारी वाजपेयी आ लालकृष्ण आडवाणी जेहेन नेता सभक नेतृत्वमे पार्टी केर मजबूती भेटल आ ओ केंद्रक सत्तामे आएल। 2014 मे प्रधानमंत्री नरेंद्र मोदीक नेतृत्वमे पार्टी ऐतिहासिक जीत हासिल कयलक आ प्रचंड बहुमत संग सरकार बनौलक, जे आइ धरि सत्तामे अछि।
