महाराष्ट्रमे 20 साल बाद राज ठाकरे आ उद्धव ठाकरे राजनीतिक मंच साझा करताह। हिन्दी भाषाक विरोधमे दुनु नेता एक दोसरक समर्थनमे संयुक्त मार्चक घोषणा कयलनि अछि।
एहि निर्णयक बारेमे जानकारी शिवसेना-यूबीटीक नेता संजय राउत देलनि। फिलहाल महाराष्ट्र नवनिर्माण सेनाक नेता संदीप देशपांडे संयुक्त मार्च पर भेल सहमतिक बारेमे बतेलनि।
मनसे नेता संदीप देशपांडे कहलनि जे, राज ठाकरे आगू आबि संजय राउतकेँ फोन कयलनि। ओ एकटा रैली निकालय लेल कहलनि। मार्चक तारीखक लऽ कऽ निश्चित रूपसँ मतभेद छल, एकर समाधान कयलाक बाद 5 जुलाईकेँ रैली निकालय लेल आम सहमति अछि।
देशपांडे कहलनि जे, 5 जुलाईकेँ रैली मराठी गौरवक लेल अछि, राज वा उद्धव ठाकरेक लेल नहि। ओ कहलनि जे, “ई संयुक्त मार्च जे 5 जुलाईकेँ होबय जा रहल अछि मराठी मानुसक अछि। एकरा संयुक्त महाराष्ट्रक लड़ाई पार्ट-2 कहल जायत।”
महाराष्ट्र सरकार हालहिमे स्कूलमे हिन्दीकेँ तेसर भाषाक रूपमे अनिवार्य बनेबाक फैसला कयने छल। राज ठाकरे सबसँ पहिने एहि फैसलाक विरोध शुरू कयलनि। मनसे नेता देशपांडे भाजपा पर आरोप लगेलनि जे ओ उत्तर भारतीय वोट हासिल करबाक लेल हिन्दी-मराठी मुद्दाकेँ राजनीतिकरण कय रहल अछि। देशपांडे कहलनि जे, भाजपाकेँ राजनीति करय केर आदति अछि, हिंदी-मराठी भाषाक विवादकेँ उठेलक ? हिन्दी शक्तिक फैसला उत्तर भारतीय वोट हासिल करय लेल कयल गेल छल। ओ सब हमरा सब पर राजनीति करयकेँ आरोप लगा रहल छथि।
